jk grants charter to 7 universities

President Jakaya Mrisho Kikwete grants a charter to the Chancellor of the the New Dodoma University former President Benjamin Mkapa during a colourful ceremony held at the State House in Dar es Salaam this afternoon.

Seven Public universities were granted the charter during the ceremony. They include Mzumbe University, Sokoine University, The Open Univesity of Tanzania, Muhimbili University college of Health sciences, Ardhi University, and University of Dar es Salaam

HOTUBA YA RAIS WA JAMHURI YA MUUNGANO WA TANZANIA, MHESHIMIWA JAKAYA MRISHO KIKWETE, KWENYE SHEREHE YA KUTOA HATI KWA VYUO VIKUU,VIWANJA WA IKULU, DAR ES SALAAM TAREHE 5 MACHI, 2008


Mhe. Waziri;
Waheshimiwa Naibu Mawaziri;
Wakuu wa Vyuo, Makamu Wakuu wa Vyuo Vikuu,

Profesa Nkunya ametukaribisha kwenye shughuli hii.
Niruhusuni niwakaribishe nyote hapa Ikulu. Ni furaha na heshima kubwa, kupewa fursa ya kufanya kazi hii adhimu ya kutoa Hati za Vyuo Vikuu saba vya umma. Hati zinazotolewa kwa mujibu wa Sheria ya Vyuo Vikuu ya mwaka 2005.
Pengine watu wengi wanajiuliza kwa nini leo wakati vyuo vikuu hivi vimekuwepo kwa miaka mingi ukiacha labda Chuo Kikuu cha Dodoma. Profesa Mbwete ameeleza vizuri. Sababu ni kuwepo mahitaji ya kufanya hivyo kwa mujibu wa sheria mpya ya 2005. Lakini pia ni ule ukweli kwamba, baadhi ya vyuo kama cha Muhimbili na cha Ardhi, vilikuwa sehemu ya Chuo Kikuu cha Dar es Salaam na sasa vinakuwa vyuo vinavyo jitegemea.

Pongezi:

Napenda kuitumia nafasi hii kuwapongeza Wakuu wa Vyuo Vikuu, Wenyeviti na Wajumbe wa Mabaraza ya Vyuo Vikuu pamoja na Makamu Wakuu wa Vyuo Vikuu, Manaibu wao na Wahadhiri wote kwa kazi nzuri waifanyayo ya kuliwezesha taifa letu kupata nguvu kazi yenye elimu na taaluma. Nawapongeza pia kwa kukamilisha masharti yaliyowawezesha kupata hati zao leo. Naamini itawahamamisha wale ambao hawajamaliza wafanye hivyo. Mmetoa na mnaendelea kutoa mchango muhimu sana kwa maendeleo ya nchi yetu na watu wake. Nawasihi tafadhalini endeleeni na moyo na juhudi hizo hizo au hata kuzidi.
Natambua kuwa wakati mwingine mnafanya kazi zenu katika mazingira ambayo yangestahili kuwa bora zaidi. Napenda kuwahakikishia kuwa kuyafanya mazingira yetu ya kufanyia kazi na kufanya mazingira ya wanafunzi wenu kuwa bora zaidi kwa kuishi na kusomea, ni dhamira yetu ya kudumu. Ni dhamira endelevu. Tutaendelea kutimiza hayo kila tupatapo uwezo na hasa katika kila bajeti. Tumekuwa tunafanya hivyo huko nyuma, tunafanya hivyo sasa na tutafanya hivyo siku za usoni.
Ili tujihakikishie maendeleo endelevu sasa na siku za usoni, hatuna budi kupata watu wengi waliopata elimu ya juu hususani elimu ya Chuo Kikuu katika fani mbalimbali za kusaidia kusukuma kwa kasi zaidi gurudumu la maendeleo.

Ni kutokana na kuutambua ukweli huo ndiyo maana kuwekeza katika elimu ya juu limekuwa jambo la kipaumbele cha juu kwa Chama na Serikali. Bila ya shaka mnakumbuka kuwa Chama cha TANU kilitoa jengo lake pale Lumumba kwa ajili ya kuanzisha Chuo Kikuu cha Dar es Salaam.

Kadhalika miongoni mwa mambo ya mwanzo mwanzo kabisa kufanywa na Serikali ya Tanganyika huru wakati ule ni ujenzi wa Chuo Kikuu cha Dar es Salaam pale Mlimani kilipo sasa. Kuendeleza elimu ya juu, kumeendelea kupewa kipaumbele cha juu mpaka sasa.

Ndiyo maana tangu Lumumba mwaka 1963 na sasa tunavyo Vyuo Vikuu vya Umma 7 na Vyuo Vikuu vishiriki 3.

Kuanzishwa kwa Chuo Kikuu cha Dodoma chenye upeo wa kuwa na wanafunzi wengi kuliko vyote nchini, na kuendelea kupanua vyuo vikuu vilivyopo sasa kwa majengo, kazi na wanafunzi ni ushahidi tosha wa ukweli huo. Hata hivyo bado tuko nyuma.

Wakati nikiendelea kuwathibitishia kuwa tutaendelea kupanua na kuchukua hatua za kuimarisha elimu ya juu nchini, naomba nisisitize au kuomba mambo machache muhimu.

Jambo la kwanza, lazima tutafute njia ya kuongeza wahitimu wa fani za sayansi na teknolojia. Ni ukweli ulioje kuwa ni wahitimu hawa pengine wengine ndiyo chachu kubwa ya kuleta mageuzi na maendeleo nchini. Sifurahishwi na idadi ndogo ya wahitimu kwenye fani hizi hivi sasa nchini.

Hatuna budi kuirekebisha hali hiyo vinginevyo maendeleo yatachelewa sana na hata pale tulipofanikiwa kuna hatari ya kurudi nyuma. Natambua haja ya kulitazama tatizo hili kwa mapana hata kwa maana ya kuuangalia mfumo mzima wa elimu nchini. Lakini, hata haja hiyo hakuna mahali pengine pa kusema jambo hilo likapata sikio sikivu kushinda hapa leo. Wahusika wote wapo. Naomba mkalifanyie kazi.

Jambo la pili, ambalo ni ombi ni kuwataka muitazame mitaala yenu ili iweze kutoa jibu kwa kuwa na wahitimu wanaohitajika katika soko la ajira. Aidha, mitaala yenu pia iwawezeshe vijana wanaohitimu kuweza kujiajiri wenyewe iwapo hawatapata kazi ya ajira au wataamua kujiajiri wenyewe.

Kwa ajili ya hili la pili pengine mafunzo ya ujasiriamali yangetolewa kwa wanafunzi wetu ili wapate a,b, c za kuanzisha na kuendesha shughuli zao za kuwapatia kipato. Jambo hili litawapa moyo wa kujiamini na kujua la kufanya wanapoamua au wanapolazimika kujiajiri.

Jambo la tatu ambalo ni ombi kwenu, ni kuwataka muendelee kuhakikisha kuwa viwango na sifa za kitaaluma vya wahitimu wetu vinaendelea kuwa vya juu. Vyuo Vikuu vyetu vya Umma vinayo sifa hiyo nchini na popote duniani, ni muhimu kuidumisha sifa hiyo. Shahada katika fani fulani itolewayo hapa lazima itambuliwe kuwa shahada popote duniani. Isiwe kwamba mhitimu wetu anapovuka mipaka ya nchi yetu hadhi ya shahada yake ni sawa na diploma kwingineko.

Kama nilivyosema, sifa yetu ni nzuri duniani. Tuidumishe. Nalisisitiza hili kwa kuwataka msijisahau. Hatari hiyo inaweza kutokea hasa wakati huu kunapokuwa na wahitimu wengi wa Form VI na mahitaji ni makubwa na nafasi na upanuzi unakuwa wa kasi kubwa.

Ombi langu la nne kwenu ni kuangalia uwezekano wa kuongeza matumizi ya teknolojia ya kisasa ya mawasiliano na habari katika kufundishia (ICT). Naamini tukiongeza matumizi yake tutawafikia watu wengi zaidi na tutapunguza hata gharama za kujenga majengo kwa ajili ya kuwaweka wanafunzi darasani. Pamoja na hayo niwaombe pia tuhimize mafunzo ya ICT kama chombo mtambuka katika kuleta maendeleo.

Jambo la tano ambalo nalo ni ombi kwenu ni kutaka vyuo vikuu vyetu viwekeze katika shughuli za utafiti na ushauri. Pamoja na kazi ya kufundisha, vyuo vikuu ni chemchem ya mawazo mapya na bora zaidi ya kufanya mambo na kukabili changamoto katika jamii. Hii ina maana ya kuwa vituo vya utafiti ili vipate mawazo mapya na bora ya kushauri jamii. Natambua kazi hiyo inafanyika lakini nawaomba mfanye zaidi.

Kwa upande wangu nitataka wenzangu serikalini na katika jamii kujenga tabia ya kutumia kazi za utafiti zinazofanywa na vyuo vyetu vikuu na taasisi nyinginezo nchini.

Kabla ya kumaliza nieleze matumaini yangu kuwa vyuo vikuu vingine navyo vitapatiwa hati zao mapema iwezekanavyo. Natambua kuwa vilivyobaki ni vyuo vikuu binafsi. Wasije wakaona wamebaguliwa. Sekta binafsi inatoa mchango muhimu katika kutoa elimu ya juu nchini.

Mwaka huu asilimia 45 ya wanafunzi wa mwaka wa kwanza wa vyuo vikuu wamejiunga na vyuo binafsi. Ni wabia muhimu. Napenda kuwahakikishia ushirikiano na msaada wa serikali pale unapohitajika, katika uwekezaji wao katika elimu kwa ujumla wake.

Mwisho, nimalize kama nilivyoanza kwa kuwapongeza kwa haya tuliyofanya leo na kuwatakia kila la heri. Nawahakikishia kuwa Serikali itakuwa pamoja nanyi.


Ahsanteni.