kero ya usafiri gogolamboto

Ndugu michuzi, mimi ni miongoni mwa wapenzi wa blog hii. Tunaipenda kwasababu ni moja ya chombo kinachosaidia wanyonge, kwa kupata habari , na kutoa habari zao pia. Nami nimeona nitumie uwanja huu kutoa dukuduku letu sisi wananchi wa Gongolamboto na vitongoji vyake kuhusiana na swala zima la Usafiri.

Kipindi cha nyuma tulikuwa tukiwacheka `Mbagala’ kwa jinsi walivyokuwa wakisota kwa usafiri. Lakini kwao sasa hivi mabasi yapo mengi ila tu foleni ndio kikwazo kwao. Adha hii sasa hivi imeelekea kwetu wakazi wa Gongolamboto na vitongoji vyake.

Adha hizi zimezidi kwasababu eneo hili la Gongolamboto na vitongoji vyake limekuwa haraka sana. Wakazi wengi wamejenga huko, hivyo idadi ya wananchi ambao wengi wao ni wafanyabiashara, wafanyakazi na wanafunzi imekuwa kubwa kuliko huduma kama za usafiri.

Tatizo letu kubwa ni usafiri. Tunaamuka saa kumi ili tuweze kufika makazini kwetu, lakini cha ajabu unaweza ukasota ukajikuta unafika ofisini saa tatu, na unarejea nyumbani saa tatu za usiku (unaacha watoto wamelala unawakuta wamelala).

Magari mengi yaliyopangiwa huko hayakamilishi `ruti’ zao, mengi yanakatisha njia. Mfano, wengi wetu ambao tunaishi Kipunguni, au vijiji vya karibu inabidi tupande magari matatu au manne hadi makazini kwa wale wanaofanyia kazi maeneo kama Msasani, Mikocheni, na nauli zake ni shilingi 350, kwa kichwa. Baya zaidi ili upate gari inabidi upande kwa mtindo uitwao `geuza nalo’ yaani ulipe nauli mara mbili, kwa kwenda nalo, angalao mwendo kiasi halafu ugeuze nalo, hapo unalipa mara mbili ya nauli hiyo.

Jaribu kufikiria mwenyewe mishahara ilivyo, halafu kwa siku kwa wale tunaofanyia kazi Mikocheni tunatumia shilingi zaidi ya shilingi elifu mbili kwa usafiri tu, je watoto watakula nini, utalipia nini ada zao, je utapata wapi hela yao ya matibabu ! Mwajiri hajui wala hajali kuhusu matatizo haya.

Tunaomba vyombo vinavyohusika waangaze eneo hili, watusaidie na sisi.

Barabara ziendazo vitongojini ni mbovu ajabu (Pitia Mombasa kwenda Kipunguni utaona mwenyewe, na kwingineko). Wale waliojisajili kusafirisha abiria maeneo haya kama hawawezi waseme, wapewe watu wengine. Yawepo magari ya moja kwa moja kutoka vitongojini hadi mijini, Kariakoo, Posta, Mwenge na kwingineko, kuliko kupanda magari mengi tofauti. Asubuhi na jioni matrafiki waangalie sana hawa madereva wanaokatisha njia.

Tunategemea mabadiliko ya haraka ili na sisi tufike ofisini tukiwa hatujachoka kwa sababu ya usafiri, kwani ni heri ya kwenda Morogoro unaweza ukafika mapema ukiwa na nguvu zako kuliko usafiri wa Gongolamboto.

Mimi Mdau wa Kipinguni.