Tishio la Bomoa Bomoa Mbezi Juu: Wakazi Waishi kwa Wasiwasi!.

Na Pascal Mayalla

Wakazi wa Eneo la Mbezi Juu, barabara ya Goba, kuanzia eneo la Samaki Wabichi, jijini Dar es Salaam, wameitaka serikali kuwa wazi, kuwashirikisha wananchi, na kuzingatia sheria, taratibu na kanuni, katika utekelezaji wake wa mipango mbalimbnali ya maendeleo, vinginevyo, watajenga chuki kwa wanachi kuichukia serikali yao na viongozi wake.

Wito huo umetolewa jana, katika mkutano wa hadhara wa wakazi hao, waliokutana kujadili tishio la kukumbwa na bomoa bomoa ya upanuzi wa Barabara ya Goba kwa kiwango cha lami, kuunganisha barabara ya Bagamoyo kuanzia eneo la Samaki Wabichi na kuunganishwa na Barabara ya Morogoro, eneo la Mbezi Mwisho.

Huku wakiongozewa na Mwenyekiti wa kikao hicho, Dr. Winfred Milinga, amesema wakazi hao, wanaishi kwa wasiwasi na roho juu, kufuatia tishio hilo la bomoa bomoa ambayo serikali kupitia wakala wa barabara, Tanroad, inaliendesha kinyemela kwa kuiarifu Serikali ya Mtaa kama taarifa bila ushirikishwaji wowote wa wananchi ambao ndio waathirika.

Dr. Milinga amesema tishio hilo limeanzia kwa Barua ya Tanroad yenye kumb. No. RM/TRD/DSM/R.90.1/Vol.II/23 ya tarehe 25/02/2010, toka kwa meneja wa TANROAD wa Mkoa, kwenda kwa Serikali ya Mtaa ukielezea mipaka mipya ya barabara hiyo ni Mita 22.5 toka katikati ya barabara, toka mita 5 zilizopo sasa, hali itakayopelekea bomoa bomoa kuzikumba nyumba zote zilizoko kando kando ya barabara hiyo.

Sehemu ya barua hiyo iliyosainiwa na Bw. Nyabakari, imeeeleza nioa ya serikali kuifanyia matengenezo barabara hiyo ya Goba toka Mbezi Mwisho hadi Samaki Wabichi pamoja na kuweka mipaka kuonyesha mwisho wa hifadhi ya barabara ya mita 22.5 toka katikati ya barabara. “Lengo ni kutambua hifadhi ya barabara na kuwatahadharisha wananchi kutokujenga ndani ya hifadhi hiyo”. Ilisema sehemu ya barua hiyo.

Barua hiyo, ilifuatiwa na uvamizi wa maofisa wa Tanroad kuingia kimabavu kwenye nyumba za kando kando ya barabara na kusimika mawe (beacons) mapya umbali wa mita 22.5 toka katikati ya barabara, bila taarifa wala mashauriano yoyote na wakazi hao.

Dr. Milinga amefafanua zaidi kuwa kufuatia hali hiyo, amefanya mawasiliano na ofisa huyo wa Tanroad ambaye alikubali kuja kuwafafanulia wakazi hao, kitu kinachoendelea na walikubaliana afike siku ya Jumamosi, 19/03/111 Saa 4 asubuhi, hivyo wananchi wakakusanyika ili kupata ufafanuzi huo, lakini ofisa huyo hakutokea na wala hakutoa udhuru wowote.

Mkazi wa eneo hilo, Balozi Mstaafu, Fanuel Kuzilwa, (Mninukulu wa Ikulu Mstaafu), amesema kitendo cha serikali kuwaweka wananchi wake katika wasiwasi wa maisha yao, kunajenga chuki kwa wananchi hao kuichukia serikali yao na viongozi wake hivyo kutishia amani na utulivu wa taifa kwa ujumla.

Mkazi Mwingine, Balozi Mstaafu, Herman Martin Mkwizu, iliishauri serikali kwa vile hiyo sio barabara kuu, isilazimishe ubomoaji usio wa lazima, badala yake ikubali uwepo wa barabara nyembamba kama miji mingine na kutolea mfano Barabara ya Samora, Mji mkongwe wa Zanzibar, na hata miji mikubwa ya kimataifa kama Roma, Venis, Vatican, ina barabara nyembamba na serikali zimeyakubali matokeo hayo.

Mjumbe wa eneo hilo, Mzee Ali selemani, huku akizungumza kwa jazba, ameitaka serikali kuwaheshimu wananchi wake kwa kusisitiza “serikali ni wananchi ndio walioichagua iwaongoze, bila wananchi, hakuna serikali, sasa iweje serikali yao walioichagua kwa kura zao, ije iwatendee visivyo?!!.

Amesema yeye ameishi eneo hilo tangu mwaka 1948, leo watu wa Tanroad wanakuja na kutishia kuivunja nyumba yake bila maelezo yoyote au ufafanuzi wa fidia, aliuza kwa umri wake wa miaka zaidi ya 70, ataanzia wapi?!.

Mzee Jackson Msokwa, amesema kama serikali, itafuata sheria, taratibu na kanuni, zinazotawala utwaaji wa maeneo ya watu kwa ajili ya shughuli za maendeo, hakutatokeo migogoro yoyote, na kusisitiza hatua ya kwanza kabisa ni ushirikishwaji wa wananchi ndipo utekelezaji unafuata, kitendo cha serikali kuanza na utekelezaji bila ushirikishwaji, ndicho chanzo kikuu cha migogoro.

Kikao hicho kimeteua kamati ya Watu saba, wakiongozwa na Dr. Milinga, kufuatilia suala hilo serikali. Wajumbe wengine wa kamati hiyo ni Bw. Jamuhuri Ngelime, Balozi Fanuel Kuzilwa, Jacson Musokwa, Baalozi, Mkwizu, Bibi Rehema Kayuni na Bibi Mary Hamisi ambaye pia ni katibu wa kamati hiyo.