ZAIDI ya wanyama 200 hugongwa na magari katika hifadhi ya taifa ya Mikumi kila mwaka

Na Dixon Busagaga wa globu ya jamii aliyeko Mikumi Morogoro. 

 ZAIDI ya wanyama 200 wa aina tofauti 12, katika hifadhi ya Taifa ya Mikumi,kila mwaka hufa kwa kugongwa na magari katika barabara kuu ya Dar es Salaam hadi Zambia inayopita katikati ya hifadhi hiyo kwa kipande cha kilometa 50. 

Na kutokana na magari kupita hifadhini bila kulipia na kusababisha mauaji ya wanyama, serikali imekuwa ikipoteza mapato ya zaidi ya Sh billion 6 kwa mwaka, Kaimu Mkuu wa Hifadhi ya Taifa ya Mikumi, Damiani Saru amesema.

Akiongea na waandishi wa habari 10 wa mkoa wa Kilimanjaro, walio kwenye ziara za kutembelea hifadhi za taifa Bw Saru alisema kipande cha barabara kinachopita kwenye hifadhi hiyo kina urefu wa kilomita 50, ambapo kuna mabango mbalimbali yakiwataka madereva kwenda kwa mwendo mdogo lakini bado wameendelea kuendesha kwa mwendo wa kasi unaoathiri  wanyama hao. 

 Alisema kwa kipindi cha miezi mitatu iliyopita wanyama zaidi ya wanyama 40 walikufa na baadhi ya magari yalikamatwa na kutozwa faini kulingana na aina ya mnyama. 

 “Faini inayotozwa si suluisho kwani si mara zote wanagogwa wakati askari wa wanyamapori wakiwepo mara nyingine inatokea wakati hawapo na wahusika kukimbia na kubaki kuokota mizoga…tumefanya utafiki kwa mwaka tungekusanya Sh billion 6 iwapo magari yote yanayopita yangelipa” alisema.

Aliainisha wanyama wanaogongwa mara kwa mara kuwa ni swala pala ambao huruka kwa wastani wa 15 hadi 20, samba, chui, twiga, tembo, nyani, nguruwe na digidigi na zaidi hutokea nyakati za usiku. 

Bw Saru aliongeza kuwa Shirika la Hifadhi za Taifa (Tanapa), limewasilisha andiko kwa serikali kuelea umuhimu wa kuondolewa kwa barabara hiyo na inavyoendelea kuwepo ina athari gani kwa mustakabali wa wanyama na wanaednelea kusubiri majibu. 

 Mhifadhi huyo alisema awali waliweka kizuia kwa magari mwanzo na mwisho wa hifadhi na kila gari kutakiwa kulipia, ili kuepusha utalii wa bure, ujangili na kugonga wanyama, lakini Walaka wa Barabara nchini (Tanroads) walipinga suala hilo kwa kuna barabara ni mali yao. “Ifike mahali tiuone wanyama wanakwishwa, kulea mnyama mmoja hadi akifie umri flani inacchukua muda mrefu, wakiendelea kuteketezwa kwa kugongwa na ujagili hifadhini ni wazi kuwa watakwisha” alisema Saru. 

 Naye, Mhifadhi Utalii, Tutindaga Mdoe, alisema uwepo wa barabara hiyo umeruhusu utalii wa bure, ambapo wageni ambao walitaka kutembelea hifadhi huacha kwa kuwa wanaweza kupita barabarani na kupiga picha. Hata hivyo, alisema hifadhi imechukua hatua na kuwakamata wanaofanya hivyo, lakini kwa wanaosafiri kwa mabasi wamekuwa wakijionea wanyama bure jambo ambalo linapunguza idadi ya watalii wa nje na ndani.