ombaomba matonya afungwa kwa kuomba

Na John Nditi, Morogoro

MAHAKAMA ya Mwanzo ya Nunge ya Manispaa ya Morogoro, imemhukumu omba omba maarufu Matonya Mazengo, kutumikia kifungo cha nje cha mwaka mmoja baada ya kupatikana na hatia ya kukiuka amri iliyomzuia kuendelea kufanya kazi ya kuomba mitaani.

Ofisa Ustawi wa Jamii wa Mkoa wa Morogoro, Oswin Ngungamtitu, amethibitisha kuhukumiwa kwa Matonya baada ya kufikishwa Mahakamani na Idara hiyo Mei 19, mwaka huu baada ya kukiuka masharti aliyopewa ya kumtaka asiendelee na shughuli za kuomba omba katika mitaani ya Manispaa ya Morogoro.

“ Ni kweli alikamatwa na askari wa Mgambo wa Manispaa ya Morogoro na kuletwa kwetu sisi wa Idara ya Ustawi wa Jamii ili kupata ushauri wetu kwa kusudio la kumfikisha Mahakamani” alisema Ofisa huyo wa Mkoa wa Ustawi wa Jamii

Kwa mujibu wa Ofisa huyo wa Ustawi wa Jamii wa Mkoa wa Morogoro, Matoya awali alikamatwa na Askari wa Mgambo wa Manispaa mwishino mwa mwaka jana katika zoezi la kuwaondoa ombaomba mitaani na kutakiwa kujaza fomu ya kula kiapo cha kuacha kuomba mitaani na kubalia Kambi ya Wazee wasiojiweza ya Fungafunga ya Mjini hapa.

“ Matoya alikula kiapo cha kuacha kuomba na kurudishwa Mkoani Dodoma pia aliahidi endapo akirudi Morogoro ataishi katika Kambi ya Wazee wasiojiweza na iwapo atajihusisha na kuomba basi apelekwe Mahakamani afungwe jela” aliongeza kusema Ofisa huyo.

Kwa mujibu wa Ofisa huyo , Matonya aliamua kurudi tena Mkoani Morogoro mwanzoni mwa Mei mwaka huu na kuendelea kukaa eneo la daraja la Shani Cinema na kufanya shughuli za kuomba omba kwa staili ya kulala chali chini katika eneo hilo la Daraja.

Alisema kufuatia kuwepo kwake katika eneo hilo na kuendelea na kazi hiyo , alikamatwa na Askari wa Mgambo na kufikishwa katika Ofisi za Ustawi wa Jamii na baadaye kufikishwa Mahakamani.

Kwa mujibu wa Ofisa huyo wa Idara ya Ustawi wa Jamii Mkoa wa Morogoro, baada ya kutolewa kwa hukumu hiyo, Matoya amepelekwa katika Kambi ya Wazee wasiojiweza ya Funga Funga akisubili fedha za kumsafirisha kurudi makwao.

“ Hiki kifungo cha nje cha mwaka mmoja ni kuachakutembeea mitaani kwa kazi ya kuomba…tukizipata fedha kutoka Halmashauri ya Manispaa sisi Idara ya Ustawi wa Jamii kutamsafirisha kurudi nyumbani kwao Mkoani Dodoma” alisema Ngungamtitu

Kwa mujibu wa Ofisa huyo, ombaomba wengi waliorudishwa makwao wamerudi tena na kubadili mfumo wa uombaji wa kukaa barabarani ambapo kwa sasa wanapita katika maeneo ya Mahoteli, Baa na Migahawa wakiongozana kwa zamu kwa ajili ya kuwaomba wateja.

Hivyo kutokana na kushamiri kwa hali hiyo, Ofisa huyo ameushauri Uongozi wa Halmashauri ya Manispaa ya Morogoro kuchukua hatua kwa kuwaelekeza Askari wa Mgambo kuendesha msako katika maeneo hayo.