Tume ya Madini yasisitiza uuzaji wa Madini kwenye Masoko

Afisa Madini mkazi mkoa wa Njombe na Iringa Wilfred Machumu

katikati akiambatana na Mwenyekiti wa Tume ya Madini Prof. Idris

Kikula wa kwanza kulia wakiingia kukagua soko la madini ya

Dhahabu na Vito mkoa wa Iringa. 

Mwenyekiti wa Tume ya Madini Prof. Idris Kikula wa kwanza kushoto,

Kamishna wa Tume ya Madini Prof. Abdulkarim Mruma wa nne kulia

wakiwa kwenye kikao na mwenyeji wao mkuu wa mkoa Ruvuma

Christina Mndeme kuhusu ukusanyaji wa maduhuli ya serikali kupitia

sekta ya madini. 

Mwenyekiti wa Tume ya Madini Prof. Idris Kikula mwenye kofia akiwa

kwenye maeneo ya wachimbaji wadogo wa kampuni ya Thomas G.

Masuka & Partners kwenye mgodi wa Nyakavangala Isimani mkoani

Iringa. 

Mwenyekiti wa Tume ya Madini Prof. Idris Kikula na Kamishna wa

Tume hiyo Prof. Abdulkarim Mruma wakiwa chini kwenye mgodi wa

kampuni ya TANCOAL inayo zalisha makaa ya mawe

walipotembelea eneo la uzalishaji mgodini hapo. 

Na Issa Mtuwa “WM” Iringa

Mwenyekiti wa Tume ya Madini Prof. Idris Kikula amekemea na kutoa onyo

kwa Wachimbaji na wanunuzi wa madini nchini kuacha tabia ya kufanya

biashara ya madini nje ya masoko yaliyoteyari na yanayoendelea

kuanzishwa mikoa yote hapa nchini. 

Prof. Kikula amesema hayo Juni 15, 2019 muda mfupi mara baada ya

kukagua soko la madini mkoani Iringa ambako hakuridhishwa na takwimu

za uuzaji wa madini ya dhahabu katika soko hilo kuwa spidi ni ndogo

akitolea mfano wa takwimu zilizotolewa na Mkaguzi wa Madini kituo cha

Iringa Severine Haule kuanzia tarehe 30 Mei, 2019 hadi tarehe 14 Juni,

2019 ni gram 92 tuu za dhahabu zimezalishwa na kupita sokoni hapo. 

Amesema serikali haina mzaha kuhusu suala hilo na yeyote atakae kutwa

anafanya biashara ya madini nje ya masoko rasmi atakumbana na mkono

wa sheria ikiwemo kutaifishwa madini na kila aina ya raslimali iliyotumika

kuwezesha ufanyikaji wa biashara hiyo, hivyo ametoa wito kwa wadau

wote kujiepusha na utoroshaji wa madini sambamba na kufanya biashara

nje ya Masoko. 

Ameongeza kuwa, jicho la serikali linaona mbali hivyo asijidanganye mtu.

Amesema kuwa ziko taarifa za ujanja ujanja kufanya biashara ya kuuziana

madini usiku wilayani Tunduru, wengine kutorosha madini kuelekea Malawi

kwa wilaya ya Songea na Mbinga, na Iringa wachimbaji wadogo, wanunuzi

wa kati (Brokers) na wanunuzi wakubwa (Dealers) kuuziana madini kwa siri

kutofikisha madini kwenye soko. Amesema taarifa zote hizo serikali inazo

hivyo amewaomba wadau wote wanaohusika na michezo hiyo waache

mara moja na kama wataendelea wajue siku zao si nyingi hivyo

wasijitafutie matatizo wakaacha familia zao bila sababu. 

Wakati huo huo Mwenyekiti ameendelea kuwasisitiza watumishi wa Tume

hiyo mikoa yote nchini kuzingatia uadilifu na kwamba kamwe wasikubali

kushawishika kwa rushwa. 

Amesema laiti kama yeye angekuwa mwepesi wa kupokea rushwa pengine

asingekuwa anaendelea kumsaidia Rais Magufuli kuwatumikia Wananchi

kwani yapo majaribu mengi na majaribio ya watu kumpelekea vifurushi na

mabegi ya fedha lakini hajawahi kuingia katika mitego hiyo na hajawahi pokea rushwa hata siku moja katika miaka 46 ya maisha yake yote ya

utumishi wa umma. 

Amewambia watumishi hao kuwa wakae wakijua wale watakao waletea

fedha hiyo siri haitabaki kwa mtu mmoja lazima itavuja na huo ndio

mwanzo wa kuharibu jina lake hivyo wasikubali rusha ni hatari. 

Mwenyekiti Prof. Idris Kikula na Kamishna wa Tume ya Madini Prof.

Abdulkarim Mruma wamehitimisha ziara yao katika mikoa ya Lindi, Mtwara,Ruvuma, Njombe na Iringa ambako walikuwa wanakagua shuguli zamadini, kuhimiza ulipaji wa maduhuli ya serikali, utatuzi wa migogoro,

kusikiliza kero na kutatua, kuongea na wafanyakazi wa tume ya madini,

wachimbaji, wafanyabiashara wa madini na kuognea na viongozi wa

serikali ngazi ya mikoa na wilaya. 

Yaliyojiri kwa ujumla katika ziara hiyo ni pamoja na; kilio cha wachimbaji

wadogo katika mikoa mbalimbali kutozwa kodi zaidi na Halmashauri za

wilaya na vijiji kinyume cha sheria ya madini, ufinyu wa bajeti, uhaba wa

watumishi na vitendea kazi kwa ofisi za tume ya madini mikoani,

ucheleweshaji wa utolewaji wa leseni za uchimbaji kwa wachimbaji

wadogo, ulipaji wa maduhuli ya serikali, uuzaji wa madini kwenye masoko

rasmi, uadilifu na kuepuka rushwa.