DC CHONGOLO ARIDHISHWA NA KASI YA UJENZI WA MADARASA KINONDONI

Muonekano wa vyumba vya madarasa vilivyojengwa.

Mkuu wa Wilaya ya Kinondoni, Daniel Chongolo akipata

maelezo kutoka kwa Afisa Elimu Sekondari wa Manispaa hiyo Joseph

Kapere wakati wa ziara ya ukaguzi wa miradi ya ujenzi wa vyumba vya

madarasa.

MKUU wa Wilaya ya Kinondoni, Daniel Chongolo ameipongeza Manispaa ya Kinondoni kwa kufanikisha kwa asilimia kubwa mpango wa utekelezaji wa miradi ya ujenzi wa vyumba vya madarasa 110 ikiwa ni katika kuhakikisha kwamba wanafunzi walio ongezeka mwaka huu wanapata madarasa ya kusomea.

Pongezi hizo zimetolewa jana wakati wa ziara yake ya kukagua miradi

hiyo ambayo inatarajiwa kukamilika mwishoni mwa mwezi huu ambapo

pamoja na mambo mengine amesema kuwa Manispaa chini ya Mkurugenzi wake Aron Kagurumjuli wametekeleza adhma hiyo kwa vitendo.

 Chongolo ameongeza kuwa madarasa hayo yatazinduliwa Februari tano

mwaka huu ikiwa ni siku muhimu ya kumbukumbu ya kuzaliwa kwa Chama cha Mapinduzi CCM  na hivyo kuanza kutumika.

Ameongeza kuwa Manispaa ya Kinondoni inazitendea haki pesa

zinazotokana na mapato ya ndani jambo linalopelekea kuwepo na

mafanikio makubwa ya miradi inayoanzishwa kwani imekuwa ikikamilika

pasipokuwa na changamoto yoyote.

“ Kwa hili nikupongeze Mkurugenzi pamoja na timu yako, kuna watu

katika Halmashauri nyingine unafanya ziara ya kukagua mradi fulani

lakini ukifika hakuna hata tofali ambalo linaweza kukupa moyo kwamba

kunakitu ambacho kinaendelea, ila hapa Kinondoni leo nimeshuhudia

kuona madarasa ambayo tulikubaliana yanajengwa na kweli yapo na

mengine wanafunzi wanatumia.” Amesema  Chongolo.

Awali Kaimu Mkurugenzi Maduhu Kazi alimueleza Mkuu wa Wilaya Chongolo

kuwa Manispaa inajenga madarasa 110 yenye thamani ya shilingi zaidi ya

Bilioni mbili ambapo kati yake madarasa 46 ni ya shule ya msingi na

madarasa 64 ni ya Sekondari ambayo yote yatakamilika mwisho mwa mwezi

huu na hivyo kuanza kutumika na wanafunzi.

Mstahiki Meya wa Manispaa hiyo Mhe. Songoro Mnyonge amesema kuwa

mafanikio hayo yanatokana na kuwepo kwa uongozi imara wa Mkurugenzi

Kagurumjuli kwani amekuwa akitumia fedha za makusanyo ya ndani kwa

ajili ya kufanikisha miradi ya maendeleo kwa umaridadi mkubwa.

Ziara hiyo ilihuisha kamati ya ulinzi na usalama ya Wilaya, viongozi

wa Chama Cha Mapinduzi ngazi ya Wilaya, mstahiki Meya, Kaimu

Mkurugenzi, Wakuu wa Idara pamoja na wataalamu mbalimbali.