WADAIWA SUGU WA ARDHI KUFUTIWA UMILIKI KWA MUJIBU WA SHERIA

Naibu Waziri wa Ardhi Nyumba na Maendeleo ya Makazi Dkt

Angeline Mabula akisisitiza jambo wakati wa kikao chake na watendaji

wa sekta ya ardhi katika mkoa wa Simiyu wakati wa ziara ya siku moja

katika mkoa huo tarehe 25 Januari 2021. Wa pili kushoto ni Mkuu wa

wilaya ya Bariadi Festo Kiswaga na kulia ni Kamishna wa Ardhi Msaidizi

mkoa wa Simiyu Essau Mawakatumbula.

Naibu Waziri wa Ardhi Nyumba na Maendeleo ya Makazi Dkt

Angeline Mabula akikabidhi Hati ya Ardhi kwa Wenza Ramadhani na Martha

Zongo wakazi wa Bariadi mkoa wa Simiyu wakati wa ziara ya siku moja

katika mkoa huo tarehe 25 Januari 2021. kushoto ni Mkuu wa wilaya ya

Bariadi Festo Kiswaga.

Naibu Waziri wa Ardhi Nyumba na Maendeleo ya Makazi Dkt

Angeline Mabula (katikati waliokaa) akiwa katika picha ya pamoja na

wananchi wa Bariadi mkoa wa Simiyu aliowakabidhi Hati za Ardhi wakati

wa ziara yake ya siku moja katika mkoa huo tarehe 25 Januari 2021. Wa

pili kushoto ni Mkuu wa Wilaya ya Bariadi Festo Kiswaga na wa pili

kulia ni Kamishna wa Ardhi Msaidizi mkoa wa Simiyu Essau Mwakatumbula.

Meneja Uhusiano na Huduma za Jamii wa Shirika la Nyumba la

Taifa (NHC) Muungano Saguya akifafanua jambo katika Ofisi ya mkuu wa

mkoa wa Simiyu wakati wa ziara ya Naibu Waziri wa Ardhi Nyumba na

Maendeleo ya Makazi Dkt Angeline Mabula kukagua utendaji kazi wa sekta

ya ardhi katika mkoa huo tarehe 25 Januari 2021.

 

Na Munir Shemweta, WANMM SIMIYU

NAIBU Waziri wa Ardhi Nyumba na Maendeleo ya Makazi Dkt Angeline

Mabula amewaagiza Maafisa Ardhi katika halmashauri nchini kuanza

kufatilia umiliki wa ardhi na wadaiwa wote sugu wa kodi ya pango wa ardhi

kwa mujibu wa sheria.

Mmiliki yeyote wa ardhi anapaswa kulipa kodi ya pango la ardhi ikiwa

ni sehemu ya utekelezaji wa masharti ya umiliki kwa mujibu wa kifungu

33 (1) cha sheria ya ardhi Na 4 ya mwaka 1999.

Aidha, kifungu cha 48(1) (g) kinaelekeza kuwa kodi ya ardhi isipolipwa

kwa kipindi cha miezi sita mara baada ya mmiliki kutumiwa ilani ya

madai mmiliki huyo anaweza kufutiwa milki yake.

Akiwa katika ziara yake ya siku moja katika Mkoa wa Simiyu tarehe 25

Januari 2021 kuhamasisha ukusanyaji maduhuli ya serikali kupitia kodi

ya pango la ardhi na kuzungunza na watendaji wa sekta ya ardhi, Naibu

Waziri wa Ardhi aliwaelekeza wataalamu wa sekta ya ardhi kuhakikisha

wanatekeleza matakwa hayo ya kisheria Na 4 ya mwaka 1999 kwa

kuisimamia vyema.

"Nawaagiza Maafisa Ardhi katika halmashauri zote kuhakikisha sheria

inachukua mkondo wake na msiendelee kuwalea wadaiwa sugu wa kodi ya

ardhi na mzingatie sheria Na 4 ya ardhi wakati mnatekeleza majukumu

yenu ikiwemo kufuta umiliki baada ya miezi sita kwa wadaiwa." alisema

Dkt Mabula.

Naibu Waziri wa Ardhi Nyumba na Maendeleo ya Makazi Dkt Angeline

Mabula aliwataka Wakurugenzi katika halmashauri za mkoa wa Simiyu

kuzitumia vyema idara za ardhi katika masuala yote yanayohusu ardhi

ikiwemo upangaji wa miji kwa kuwa mamlaka za upangaji ziko chini ya

halmashauri hizo na kusisitiza kuwa wakurugenzi hao wasipozitumia

vyema idara za ardhi kuna hatari ya kuendelea kwa ujenzi holela.

Aidha, Dkt Mabula ameonesha kutoridhishwa na kasi ndogo ya ukusanyaji

kodi ya pango la ardhi katika mkoa wa Simiyu ambapo hadi sasa mkoa huo

umekusanya shilingi 87,654,120 sawa na asilimia 24 huku mkoa ukidai

zaidi ya Bilioni 5.5 kutoka kwa wadaiwa sugu wa kodi ya ardhi.

Kwa upande wake Kamishna Msaidizi wa Ardhi katika mkoa wa Simiyu Essau

Mwakatumbula alimueleza Naibu Waziri wa Ardhi Dkt Mabula kuwa ofisi

yake itahakikisha inaongeza kasi ya kufuatilia wadaiwa sugu wa kodi ya

ardhi ili iweze  kukusanya madeni na kufikia malengo ya makusanyo ya

kodi ya ardhi iliyojiwekea.

Hata hivyo, alisema pamoja na jitihada za mkoa katika kuhakikisha

wadaiwa wote wa kodi ya ardhi wanalipa kuna changamoto kwa baadhi ya

taasisi kutoonesha jitihada zozote za kulipa na kutolea mfano wa VETA,

SIDO na SHIRECU.