WILAYA YA TUNDURU YAZINDUA KAMPENI YA KUTOKOMEZA UGONJWA WA KIFUA KIKUU MWAKA 2021

 Muhidin Amri, Tunduru

HOSPITALI ya wilaya ya Tunduru mkoani Ruvuma, imezindua rasmi kampeni

ya kutokomeza maambukizi ya ugonjwa wa kifua kikuu mwaka 2021 kwa

kuanza kuwatumia wanachama wa chama cha Msalaba mwekundu(Red Cross)

kama mkakati wake utakaowezesha kupunguza maambukizi na kuwaibua watu wengi wanaougua ugonjwa huo.

Wanachama hao, wataungana na wataalam wa kitengo cha kifua kikuu na

ukoma wa Hospitali ya wilaya katika kutokomeza ugonjwa huo ambapo kwa

mkoa wa Ruvuma wilaya hiyo inaongoza kwa maambukizi makubwa ya kifua

kikuu.

Mratibu wa kifua kikuu na ukoma wa wilaya ya Tunduru Dkt Mkasange

Kihongole amesema, wameamua kuwatumia na kuwashirikisha wanachama wa Chama cha Msalaba Mwekundu  kutokana na umuhimu wao katika jamii kwa kuwapa mafunzo ambayo yatawasaidia kushiriki vyema katika mapambano ya ugonjwa huo.

“Uzinduzi wa mapambano ya kifua kikuu katika wilaya yetu kwa mwaka

2021 tumeanza na wanachama wa chama cha Msalaba Mwekundu kutokana na ukaribu wao na jamii, kwa hiyo tumelazimika kuwapa elimu kwa kuamini

kuwa tutaongeza kasi ya kuwaibua wagonjwa wengi zaidi wa kifua kikuu

katika wilaya yetu kama ilivyokuwa mwaka2020.”alisema.

Alisema, uzinduzi huo utakwenda sambamba na kufanya kampeni ya

kuelimisha na kuchunguza vimelea vya ugonjwa huo katika maeneo

mbalimbali ikiwemo taasisi za serikali,shule kwa shule, nyumba kwa

nyumba na kwenye vilinge vya waganga wa Tiba asili na tiba mbadala.

Dkt Mkasange alisema, wale watakaobainika kuwa na ugonjwa huo

wataanzishiwa dawa zinazotolewa bure katika zahanati,vituo vya Afya na

Hospitali zote na kuiomba jamii kushirikiana  katika kampeni ya mwaka

huu.

Kwa mujibu wa Dkt Mkasange,  kauli mbiu ya kampeni ya kifua kikuu

mwaka 2021 ni Tb katika wilaya ya Tunduru ni ya watu wote kwa  kila

mmoja ana wajibu kutokomeza ugonjwa huo.

Akizindua kampeni hiyo mwakilishi wa Mkuu wa wilaya ya Tunduru

Agostino Maneno, amewapongeza wanachama wa chama cha Msalaba Mwekundu kwa kukubali kuwa sehemu ya timu ya kampeni ya kutokomeza ugonjwa huo na kuwataka kwenda kushiriki kikamilifu katika kuwaibua wagonjwa wengi wa kifua kikuu.

Alisema, lengo la serikali siku zote ni kuboresha afya za wananchi

wake na kuwataka watendaji wa vijiji,mitaa na kata kuwapa ushirikiano

wanachama hao  pale wanapofika katika maeneo yao kwa ajili ya

kutekeleza  kazi hiyo  kwani wanakwenda kuongeza nguvu ya kuibua watu

wengi  na kuzuia kuongezeka kwa maambukizi ya kifua kikuu.

Maneno alisema, kimsingi kampeni yay a kutokomeza kifua kikuu sio ya

mtu mmoja  au kikundi fulani cha watu, bali kila mtu anawajibu wa

kushiriki kwa kuibua,kutokomeza na kuzuia  maambukizi ya ugonjwa huo

unaotajwa kati ya magonjwa 10 Duniani yanayoongoza kuuwa watu wengi.

Kwa upande wake Mganga Mkuu wa wilaya ya Tunduru Dkt Wendy Robert

alisema,  kuna mikakati mbalimbali ya kuibua wagonjwa wengi zaidi wa

kifua kikuu na mwaka huu wameanza kutoa elimu kwa wanachama wa Red

Cross na kuendelea kuwajengea uwezo makundi mbalimbali yakiwemo

Waganga wa tiba asili,watoa huduma ngazi ya jamii.

Alisema, mwaka huu nguvu kubwa itatumika katika kuibua wagonjwa wa

kifua kikuu hasa baada ya kuona katika wilaya hiyo kuna wagonjwa wengi

wa kifua kikuu.

Dkt Wendy alisema, mwaka jana mkakati ni kuwaibua wagonjwa 647,hata

hivyo kutokana na kazi nzuri  iliyofanywa na wataalam wa kitengo cha

kifua kikuu Hospitali ya wilaya na wadau wengine  kupitia kampeni

mbalimbali walifanikiwa kuibua watu 704.

Mmoja wa washiriki wa mafunzo hayo  Salome Golihama alisema, kupitia

mafunzo hayo jamii itarajie kupata elimu kuhusu ugonjwa wa kifua kikuu

na watahakikisha wanashiriki vyema katika mapambano ya kutokomeza

ugonjwa huo.