DKT.MPANGO AZUNGUMZA KWA MARA YA KWANZA BAADA YA KUAPISHWA KUWA MAKAMU WA RAIS

Charles James, Michuzi TV

SIKUOTA! Hii ni kauli ya Makamu wa Rais wa Jamhuri ya Muungano wa Tanzania, Dkt. Philip Mpango baada ya kuapishwa na Rais Samia Suluhu Hassan kushika nafasi hiyo leo Ikulu, Chamwino Dodoma.

Dkt. Mpango amesema nafasi aliyoteuliwa hakuwahi kuiota kuishika ambapo amemuahidi Rais Samia kuwa hatomsaliti kama ambavyo Yesu alisalitiwa na mwanafunzi wake Yuda Eskarioti kwa vipande 30 vya fedha.

"Mimi mtoto wa maskini sikuota kushika nafasi hii, nakuahidi nitatekeleza kwa bidii kazi zote utakazonielekeza na kazi zingine za katiba kama ilivyoelekezwa kwenye ibara ya 40, niko tayari kufanya kazi, nitume usiku na mchana hasa kufanikisha Ilani ya CCM.

Na katika kutekeleza majukumu hayo yote ntashirikiana na viongozi wote wa pande zote mbili za muungano, mihimili yote mingine na zaidi viongozi wengine." Amesema Dkt Mpango.

Makamu wa Rais Dkt Mpango ambaye alikua ni Mbunge wa Jimbo la Buhigwe ametoa rai kwa wananchi wa Jimbo hilo kuhakikisha wanamchagua Mbunge anayetokana na Chama cha Mapinduzi CCM ambaye ataletwa na chama hicho.

"Nishukuru pia kamati Kuu ya Halmashauri Kuu ya Chama kwa kulipitisha jina langu, niwashukuru wananchi wangu wa Buhigwe kwa kunipa imani yao kwangu kwa kunichagua, naamini hiko kibali pia kimetoka kwa Mungu na kimesaidia wewe Rais kuniteua." Amesema Dk Mpango