Habari Za Hivi Punde Habari Za Hivi Punde
Soma zaidi

at Wednesday, May 01, 2024 0

 Katika kuadhimisha Siku ya Wafanyakazi Duniani maarufu kama Mei Mosi, Wakala wa Usajili wa Biashara na Leseni (BRELA), leo tarehe 01 Mei, 2024 imetembelea Kituo cha Watoto wenye uhitaji cha CHAKUWAMA kilichopo Sinza jijini Dar es Salaam kwa ajili ya kutoa msaada wa vifaa mbalimbali.

Akikabidhi msaada huo  kwaniaba ya Afisa Mtendaji Mkuu wa BRELA, Afisa Habari Mkuu Bi. Christina Njovu alieleza kuwa Wakala imetoa msaada huo ikiwa ni sehemu ya utekelezaji wa sera  ya kurudisha kwa jamii ambapo wakala imekuwa ikiitekeleza mara kwa mara.

Baadhi ya vifaa vilivyokabidhiwa ni pamoja na vyakula vikiwemo unga, sukari,vifaa vya usafi na vifaa vya shule 

Naye Mkuu wa Kituo cha CHAKUWAMA  Bw. Hassan Hamis ameishukuru BRELA kwa kufika kituoni hapo kuwatembelea na kwa msaada uliotolewa ambao umewapa faraja kubwa ikizingatiwa kwamba hivi karibuni wamepatwa na janga la moto kwa kuunguliwa na bweni la kulala Watoto.

Aidha Bw. Hamis ameeleza kuwa, Kwa sasa kituo kina watoto 72 wa jinsia zote wenye umri tofauti kuanzia chini ya mwaka mmoja hadi miaka 19 na wengi wao wanasoma shule ya msingi na sekondari na kwamba changamoto zao ni nyingi hivyo ujio wa BRELA na vifaa ilivyotoa vitapunguza ukali wa  baadhi changamoto zinazowakabili.

Akielezea historia ya kituo hicho Bw. Hamis.amesema kuwa, Kituo kilianza mwaka 1998 kikiwa na Watoto 5 chini ya mwanzilishi Bi. Saida Hassan kikitumia nyumba ya kupanga eneo la Mikocheni ,  Kituo kimesajiliwa na kinafanya kazi kwa karibu na Wizara ya maendeleo ya jamii, jinsia Watoto na makundi maalum.

Na kuongeza kuwa kituo kina watoto aliowatenga katika  makundi sita wakiwemo,  yatima waliopoteza wazazi wote wawili,  Watoto waliopoteza mzazi mmoja, wapo waliotolewa kwenye mazingira hatarishi na wale waliofanyiwa ukatili na walio okolewa kutoka biashara haramu ya usafirishaji wa binadamu pamoja na walemavu. 

Katika Watoto 72 watoto 60 wanasoma katika ngazi tofauti kuanzia chekechea, msingi, sekondari, veta na vyuo  katika  shule za serikali na shule binafsi za kulipia. 

Aidha Bw.Hamis ameeleza kuwa moja ya changamoto wanazokabiliana nazo ni pamoja na Watoto 12 wamesimamishwa kuendelea na masomo kutona na kuathilika kiakili kulikotokana na ukatili waliofanyiwa na wengine kupata magonjwa na hivyo wanaendelea na matibabu. 

Mbali ya kutembelea kituo cha Watoto wahitaji, BRELA pia imeshiriki katika maadhimisho ya Siku ya Wafanyakazi Duniani iliyobebwa na kaulimbiu Nyongeza ya mishahara ni msingi wa mafao bora na kinga dhidi ya hali ngumu ya maisha.




Read more »

at Wednesday, May 01, 2024 0
Makamu wa Rais wa Jamhuri ya Muungano wa Tanzania Mhe. Dkt. Philip Mpango akihutubia Viongozi na Wafanyakazi kutoka Wizara, Taasisi za Serikali na Binafsi wakati wa Maadhimisho ya Siku ya Wafanyakazi Duniani ambayo Kitaifa yamefanyika katika Uwanja wa Sheikh Amri Abeid Mkoani Arusha tarehe 01 Mei 2024.

Viongozi mbalimbali wa Serikali na Sekta Binafsi wakiwa kwenye Maadhimisho ya Siku ya Wafanyakazi Duniani ambayo Kitaifa imefanyika katika Uwanja wa Sheikh Amri Abeid Mkoani Arusha tarehe 01 Mei 2024.


Makamu wa Rais wa Jamhuri ya Muungano wa Tanzania Mhe. Dkt. Philip Mpango akizindua Gazeti la Mfanyakazi Tanzania wakati wa Maadhimisho ya Siku ya Wafanyakazi Duniani ambayo Kitaifa yamefanyika katika Uwanja wa Sheikh Amri Abeid Mkoani Arusha tarehe 01 Mei 2024. Kushoto ni Waziri Mkuu Mhe. Kassim Majaliwa na kulia ni Rais wa Shirikisho la Vyama vya Wafanyakazi nchini (TUCTA) Tumaini Nyamhokya.

Makamu wa Rais wa Jamhuri ya Muungano wa Tanzania Mhe. Dkt. Philip Mpango akionesha Gazeti la Mfanyakazi Tanzania mara baada ya kulizindua wakati wa Maadhimisho ya Siku ya Wafanyakazi Duniani ambayo Kitaifa yamefanyika katika Uwanja wa Sheikh Amri Abeid Mkoani Arusha tarehe 01 Mei 2024.

Makamu wa Rais wa Jamhuri ya Muungano wa Tanzania Mhe. Dkt. Philip Mpango akitoa zawadi ya ujumla kwa Wizara ya Mambo ya Ndani ya Nchi ambao wameongoza katika michezo mbalimbali katika kuadhimisha ya Siku ya Wafanyakazi Duniani ambayo Kitaifa imefanyika katika Uwanja wa Sheikh Amri Abeid Mkoani Arusha tarehe 01 Mei 2024.
Read more »

at Wednesday, May 01, 2024 0

Na Mwandishi Wetu, Arusha

MKUU wa Mkoa wa Arusha, Paul Makonda ametoa wito kwa Kampuni ya Geita Gold Mining Limited (GGML) kuhakikisha fedha zinazotolewa na kampuni hiyo kutekeleza miradi mbalimbali ya kijamii (CSR) zinagusa na kubadilisha maisha ya wananchi wa mkoa wa Geita na Tanzania kwa ujumla.

Mbali na kuipongeza GGML kwa kuja na tenolojia mbalimbali za uokoaji katika maonesho ya Wakala wa Usalama na Afya Mahali pa kazi (OSHA) yanayoendelea kwenye viwanja vya General jijini Arusha, pia alieleza kuridhishwa na elimu inayotolewa kwa wananchi kuhusu masuala ya afya na usalama mahali pa kazi.

Makonda ambaye alitembelea banda la GGML katika maonesho hayo jana alisema mara nyingi maisha ya watu wa Geita hayafanani na utajiri uliopo katika mkoa huo.

“Mimi sioni aibu kuitwa tajiri,kwa sababu hilo ni jambo la Kujivunia hivyo siwezi kujivunia umaskini ndio maana nataka ninyi Watanzania mliopo kwenye mgodi huu kuendelea kuwa chanzo cha mabadiliko ya watanzania wenzenu wanaozunguka mgodi huu,” alisema.

Aidha, Meneja Mwandamizi wa Afya, Usalama na Mazingira kutoka GGML, Dk Kiva Mvungi alimpatia maelezo Makonda kwamba mpango wa CSR wa mwaka huu ni mwendelezo wa mipango ya awali unaolenga kujumuisha maendeleo yaliyofikiwa na GGML hadi sasa katika maeneo ya mazingira, miundombinu, afya, elimu na biashara ndogondogo na za kati (SMEs) katika jamii ya mwenyeji wa Geita.

Dk. Kiva alitoa mfano kuwa mwaka jana GGML imesaini Mkataba wa Makubaliano (MoU) na wenyeji wake Halmashauri ya Mji Geita, Wilaya ya Geita pamoja na Halmashauri za jirani za wilaya za Chato, Bukombe na Mbogwe kutekeleza Mpango wa Uwajibikaji wake kwa Jamii (CSR) kwa mwaka 2022/2023 wenye thamani ya Sh bilioni 19.

“Jumla ya Sh bilioni 9.8 zilitengwa kwa ajili ya Halmashauri ya Mji wa Geita ambapo kwa Halmashauri ya Wilaya ya Geita, bajeti ya Sh bilioni 8.6 ilitengwa.

“Uwepo wa GGML katika mkoa wa Geita umeonyesha matokeo chanya katika sekta ya elimu baada ya kampuni hiyo kujenga miundombinu zaidi ya 1800 ya shule za msingi na sekondari katika wilaya ya Geita yenye halmashauri mbili za Geita mji na ile ya wilaya ya Geita,” alisema.

Alisema miundombinu hiyo imetokana na utekelezaji wa mabadiliko ya sheria ya madini ya mwaka 2017 ambapo GGML imekuwa ikiandaa mpango wa huduma kwa jamii kwa kushirikiana na halmashauri husika huku kila mwaka hutenga kiasi cha Sh 9.2 bilioni kwa ajili ya miradi ya maendeleo.

Mbali na miradi ya elimu, Dk. Kiva alisema GGML kupitia fedha za CSR walitenga fedha kwa ajili ya miradi ya mazingira ambapo kiasi cha Sh700 milioni zinatumika.

“Ipo pia miradi ya kimkakati ukiwemo ule wa ufugaji wa samaki, miradi kwa kinamama na vijana pamoja na wasiojiweza ambapo zaidi ya Sh1.5 bilioni zinatumika.

Alisema miradi hiyo inaongeza thamani katika sekta mbalimba za kiuchumi na kuwapatia wananchi maendeleo.

 

Mkuu wa Mkoa wa Arusha, Paul Makonda (kushoto) na Meneja Mwandamizi wa Afya, Usalama na Mazingira wa GGML, Dk Kiva Mvungi (kulia) wakifurahia jambo katika banda la GGML wakati wa maonesho ya OSHA 2024 kwenye Viwanja vya General Tyres jijini Arusha. Katika Maonyesho ya OSHA 2023, Geita Gold Mining ilitambuliwa kama kampuni iliyofanya vizuri zaidi katika masuala ya afya na usalama kazini, na pia ilitunukiwa tuzo ya muonyeshaji bora kwa ujumla.

Read more »

at Wednesday, May 01, 2024 0
Watumishi Ofisi ya Waziri Mkuu - Kazi, Vijana, Ajira na Wenye Ulemavu leo tarehe 1 Mei, 2024 wameshiriki maadhimisho ya Siku ya Wafanyakazi (Mei Mosi) yaliyofanyika kimkoa katika Uwanja wa Jamhuri, jijini Dodoma.

Maadhimisho hayo hufanyika kila mwaka ifikapo tarehe 1 Mei ambapo kwa mwaka huu kitaifa yamefanyika Jijini Arusha na Mgeni Rasmi alikuwa Makamu ya Rais, Mhe. Dkt. Philip Isdor Mpango.




Read more »

at Wednesday, May 01, 2024 0

Naibu Waziri Ofisi ya Waziri Mkuu-Kazi, Vijana, Ajira na Wenye Ulemavu, Mhe. Patrobas Katambi (wa pili kushoto) na Katibu Mkuu Ofisi ya Makamu wa Rais ,Mary Maganga (wa pili kulia) wakikabidhi tuzo ya ushindi wa Jumla kwa wafanyakazi wa Barrick (kutoka kushoto) ni Hassan Kallegeya Safety Coordinator (Bulyanhulu) na kulia ni Aristides Medard (Specialist Occupational Hygiene, Katika hafla iliyofanyika jijini Arusha. Mbali na ushindi wa Jumla Barrick imeshinda tuzo nyingine 4

Naibu Katibu Mkuu, Wizara ya Habari, Mawasiliano na Teknolojia ya Habari, Nicolaus Mkapa, akimkabidhi tuzo kwa ushindi wa kwanza katika sekta ya madini kwa Mtaalamu wa masuala ya Usalama wa Barrick –Specialist Occupational Hygiene, Aristides Medard katika hafla ya kukabidhi tuzo iliyofanyika jijini Arusha. Wengine pichani ni Wafanyakazi wa Barrick. Mbali na ushindi wa Jumla Barrick imeshinda tuzo nyingine 4.






Wafanyakazi wa Barrick wakifurahia tuzo ambazo kampuni imejishindia.


Na Mwandishi Wetu.


Barrick Tanzania imenyakua tuzo tano katika hafla ya utoaji wa tuzo za Usalama na Afya Mahali pa Kazi (OSHA) ya 2024 iliyofanyika jijini Arusha ambapo Mgodi wa Dhahabu wa Barrick Bulyanhulu, umeshinda tuzo kubwa ya mshindi wa juu wa Jumla katika Tuzo ya Afya na Usalama (OHS) 2024.

Mbali na ushindi huo mkubwa, Bulyanhulu, pia ilinyakua tuzo za Utawala Bora ofisini, usaidizi wa kiofisi na shughuli za ukuzaji biashara , na mshindi Bora wa Ubunifu kwenye maonyesho ya OSHA ya mwaka huu kwenye sekta ya madini.

Kwa upande wake, Barrick North Mara ilishinda tuzo ya juu katika Kuwajali Zaidi Wafanyakazi wenye Mahitaji Maalum.

Maonyesho ya OSHA mwaka huu yalifanyika katika viwanja vya General Tyre jijini Arusha, ambapo mgeni rasmi alikuwa ni Waziri wa Nchi Ofisi ya Waziri Mkuu, Kazi, Vijana, Ajira na wenye Ulemavu, Mhe. Deogratius Ndejembi katika hafla ya utoaji wa tuzo za mwaka huu ambapo aliwakilishwa na Naibu Waziri wa Wizara hiyo, Mhe. Patrobas Katambi.

Barrick Tanzania imeshinda tuzo za 2024 kutokana na mafanikio ya 2023 ya kampuni ambapo ilishinda tuzo ya jumla ikiwemo tuzo za uandaaji Ripoti Bora ya Tathmini ya Hatari katika uchimbaji madini na mshindi Bora wa tuzo ya Usalama na afya (OHS) katika sekta ya madini.

Tuzo nyingine ilizoshinda zilikuwa ni Kujali zaidi Wafanyakazi wenye Mahitaji Maalum na utekelezaji sera bora ya Usalama mahali pa kazi (OHS), mshindi wa pili kwa washindi wa jumla wa sekta ya Madini, utekelezaji Mpango Kazi Bora wa Usalama na Afya mahali pa kazi.

Usalama ni sehemu muhimu ya DNA ya Barrick. Kampuni ina mpango maalum kwa ajili ya usalama wa wafanyakazi wake na wakandarasi, kuhakikisha kwamba kila mtu anarudi nyumbani akiwa na afya njema na salama. Juu ya yote hayo katika Barrick kila mtu amejitolea kufanya a kuhakikisha hakuna matukuo ya ajali katika sehemu yake anapofanyia kazi.

Katika maonesho ya mwaka huu Barrick pia ilifiikisha elimu ya afya na usalama kwa wananchi waliotembelea kwenye banda lake kwenye maonesho haya sambamba na kushiriki zoezi la kupanda miti katika kutekeleza kwa vitendo kauli mbiu ya maonesho ya athari za mabadiliko ya tabia nchi katika usalama na afya kazini:sajili eneo lako la kazi OSHA katika harakati za kupunguza athari hizo.
Read more »

at Wednesday, May 01, 2024 0

Na Mwandishi Wetu 

MAMLAKA ya Hali ya Hewa Tanzania (TMA)  imesema uwepo wa mgandamizo mdogo wa hewa katika Bahari ya Hindi mashariki mwa pwani ya Mtwara kunatarajiwa kusababisha uwepo wa vipindi vikubwa vya mvua katika  baadhi ya maeneo ya mikoa ya Mtwara, Lindi, Pwani, Morogoro, Dar es Salaam na maeneo ya jirani.

Katika taarifa iliyotolewa  na Mamlaka hiyo, leo Mei Mosi, 2024 inasema, mifumo ya hali ya hewa iliyopo kwa sasa inaonesha kuwa mgandamizo huo mdogo wa hewa unatarajiwa kuimarika na kufikia hadhi ya Kimbunga kamili hadi kufikia kesho, Mei 2 2024.

"Wakati mgandamizo huo mdogo wa hewa ukiendelea kuimarika, unatarajiwa pia kusogea kuelekea baadhi ya maeneo ya pwani ya nchi yetu kuanzia usiku wa kuamkia siku ya Ijumaa, Mei 3, 2024 na kwamba Mgandamizo huo mdogo wa hewa unatarajiwa kuendelea kuwepo katika maeneo ya ukanda wa pwani ya nchi  hadi  Mei 6, 2024". Imesema sehemu ya taarifa hiyo.

Imeendelea kuelezwa kuwa, Hata hivyo, mgandamizo huo mdogo wa hewa unatarajiwa kupungua nguvu baada ya Mei 6 2024.

Taarifa hiyo imesema, uwepo wa mgandamizo huo mdogo wa hewa unatarajiwa kutawala na kuathiri mifumo ya hali ya hewa hapa nchini ikiwa ni pamoja na kusababisha vipindi vya mvua kubwa na upepo mkali katika baadhi ya maeneo ya mikoa ya Mtwara, Lindi, Pwani, Morogoro, Dar es Salaam na maeneo ya jirani. 

Hata hivyo, Wananchi wanashauriwa kuendelea kufuatilia na kuzingatia taarifa za utabiri kutoka Mamlaka ya Hali ya Hewa Tanzania pamoja na kupata ushauri na miongozo ya wataalam katika sekta husika ili kujikinga na athari zinazoweza kujitokeza.

Mamlaka ya Hali ya Hewa Tanzania (TMA) inaendelea kufuatilia mwenendo wa mgandamizo huo mdogo wa hewa na athari zake kwa mifumo ya hali ya hewa hapa nchini na itaendelea kutoa taarifa mara kwa mara kila inapobidi.



Read more »

at Wednesday, May 01, 2024 0

Na Derek MURUSURI, Dodoma


SHIRIKA la Utangazaji Tanzania litaendelea kutoa fursa sawa kutangaza kampeni za vyama vyote vitakavyoshiriki uchaguzi wa mwaka huu na mwaka 2025.

"Katika Uchaguzi Mkuu wa mwaka 2020, TBC ilifuata ratiba ya kampeni ya vyama vya siasa, na kwingine TBC walifika na vyama vyenyewe havikufika," alisema Mhandisi Andrew Kisaka, Meneja wa Kitengo cha Mawasiliano cha TCRA.

Mhandishi Kisaka alikuwa akijibu hoja ya Mwanahabari na Mkuu wa Wilaya Mstaafu, Jenerali Ulimwengu.

Mwanahabari huyo, aliitaka TBC isichukue matangazo ya biashara kwa vile inafadhiliwa na Serikali na kuwataka watoe fursa sawa kwa vyama vyote vya siasa kwenye kipindi cha uchaguzi mkuu.

"Ni kweli TBC ni Shirika la Utangazaji la Umma na linaendelea kuchukua matangazo kwa sababu bado funding (ufadhili) yake haijakidhi viwango vya kuwa public broadcaster, lakini funding yake inafanyiwa kazi," alisema Mhandisi huyo.

Mhandisi Andrew Kisaka alisema hayo katika Kongamano la siku moja la wadau wa Habari na Uchaguzi, lililoandaliwa na Baraza la Habari Tanzania (MCT) katika Hoteli ya Dodoma jana (30 April, 2024).

Katika Uchaguzi wa mwaka 2020, Chama cha Demokrasia na Maendeleo (CHADEMA), waliwafukuza TBC katika mkutano wao wa kampeni.



Madhumuni

Akielezea madhumuni ya Kongamano hilo, Mkurugenzi Mtendaji wa MCT, Bw Ernest Sungura, alisema kuwa waliwaleta pamoja wadau wa habari ili kujadiliana na kuweka mikakati ya pamoja katika kuongeza uwazi, haki na uwajibikaji tunapoelekea katika chaguzi za mwaka huu na 2025.


"Dira ya MCT ni kuchangia ukuaji wa demokrasia ya Tanzania kupitia uchaguzi wa viongozi kwa sanduku la kura na kujenga jamii ya haki," alisema Bw Sungura.

Manufaa ya Kongamano

Kongamano hilo lililofadhiliwa na Ubalozi wa Marekani nchini pamoja na Shirika la Kimataifa linalohusika na masuala ya Uchaguzi (IFES), lilikuwa na manufaa manne.

Kwanza ni kukuza maadili ya kidemokrasia kutokana na kujenga misingi ya
HAKI, UWAZI na UWAJIBIKAJI.

Pili, ni kuimarisha uhuru wa kutoa maoni kupitia
vyombo vya habari.

Manufaa mengine ni kuongeza elimu kwa wapiga kura itakayowasaidia kufanya maamuzi sahihi namakini katika sanduku la kupiga kura.

Mwisho, Bw Sungura alisema ni kuimarisha ushirikiano na kuaminiana miongoni mwa wadau muhimu wa uchaguzi.

"Hii ni pamoja na kuongeza imani kwa umma kutokana na
uandishi wa Habari usioficha kitu na usioegemea upande mmoja, unaotoa taarifa sahihi na za ukweli," alisisitiza.

Kongamano hilo la kwanza kufanyika nchini, lilihudhuriwa na washiriki mbalimbali kutoka vyombo vya habari pamoja na wadau wa Habari na uchaguzi.

Waziri Mkuu na Makamu wa Kwanza wa Rais Mstaafu, Jaji Joseph Sinde Warioba, ndiye aliyekuwa Mgeni Rasmi.


Read more »

at Wednesday, May 01, 2024 0

Na Mwandishi Wetu,DODOMA

Serikali kupitia Wizara ya Mambo ya Ndani ya Nchi imewaahidi watanzania kuwepo kwa Uchaguzi Huru na Haki ikiwemo uchaguzi wa Serikali za Mitaa mwaka huu pamoja na Uchaguzi Mkuu mwakani huku ikisisitiza kila mtu atapata haki yake ya kidemokrasia ya kuchagua na kuchaguliwa bila kuwepo kwa vihatarishi vya amani katika maeneo yote ambapo chaguzi hizo zitafanyika.

Kauli hiyo imetolewa na Waziri wa Mambo ya Ndani ya Nchi,Mhandisi Hamad Masauni wakati akihojiwa na waandishi wa Habari baada ya kufungua Kikao cha Baraza Kuu la Wafanyakazi wa Wizara ya Mambo ya Ndani ya Nchi kilichofanyika Makao Makuu ya Jeshi la Magereza,Msalato jijini Dodoma huku akisisitiza kuboreshwa na kuwepo kwa ongezeko la bajeti ambalo halijapata kutokea ambapo kikao hicho kilihudhuriwa pia na Wakuu wa Vyombo vya Usalama vilivyopo chini ya wizara hiyo.

‘Niwahakikishie wananchi tumejipanga vizuri kuelekea uchaguzi wa serikali za mitaa na uchaguzi mkuu mwakani,niwaombea watanzania watege masikio kuelekea bajeti ya wizara ambayo tutaiwasilisha bungeni katikati ya mwezi unaokuja,tunaenda kuboresha takribani kila sehemu katika vyombo vyetu vya usalama hasa Jeshi la Polisi tunaenda kuliboresha katika kila sehemu ikiwemo vifaa na mambo mengine mbalimbali.’ Alisema Masauni

Akizungumzia zaidi uchaguzi Waziri Masauni amesema wananchi wasiwe na wasiwasi serikali kupitia vyombo vya usalama kupitia Jeshi la Polisi iko vizuri kwa namna yoyote ile kuhakikisha kwamba demokrasia inaendelea kutekelezwa katika misingi ya amani na utulivu,watu wanachagua na kuchaguliwa bila bughudha yoyote nan chi itaendelea kubakia salama katika maeneo yote.

Akizungumzia Uchaguzi wa Serikali za mitaa na Uchaguzi Mkuu wa mwakani Mkuu wa Jeshi la Polisi nchini,IGP Camillus Wambura amesema anampongeza Waziri wa Mambo ya Ndani ya Nchi,Mhandisi Hamad Masauni kwa kusimamia ongezeko la bajeti kwa wizara na vyombo vyake ambapo ongezeko hilo linaenda kuboresha utendaji kazi hasa wa jeshi la polisi kuelekea pia uchaguzi wa Serikali za Mita ana Uchaguzi Mwakani.

‘Mwaka huu tunakwenda kuingia kwenye uchaguzi na mwaka kesho uchaguzi mkuu,wizara yetu ina nafasi kubwa sana kuhakikisha uchaguzi unakua wa huru na wa haki kwahiyo niwaombe wajumbe kutambua kwamba hii ngoma bado ni ya kwetu na mpiga ngoma ni Mheshimiwa Waziri kwahiyo tukae tayari kucheza ngoma hiyo ili kuhakikisha chaguzi zote mbili zinapita salama’ alisema IGP Wambura

Mkutano huo wa Baraza la Wafanyakazi uliongozwa na Katibu Mkuu wa Wizara ya Mambo ya Ndani ya Nchi,Ally Senga Gugu ambapo mambo mbalimbali kuelekea Bajeti Kuu ya Wizara itakayowasilishwa bungeni katikati ya mwezi ujao yalijadiliwa huku Katibu Mkuu akiwataka watumishi kuwa wabunifu,waadilifu na kutekeleza maelekezo ya Rais wa Jamhuri ya Muungano wa Tanzania,Dkt.Samia Suluhu Hassani ya utolewaji wa huduma sahihi na zisizo na upendeleo kwa wananchi.

Waziri wa Mambo ya Ndani ya Nchi, Mhandisi Hamad Masauni(katikati) akiimba wimbo wa mshikamano pamoja na viongozi, watumishi wa wizara (hawapo pichani) wakati wa Ufunguzi wa Kikao cha Baraza Kuu la Wafanyakazi wa wizara hiyo kilichofanyika Makao Makuu ya Jeshi la Magereza,Msalato jijini Dodoma.Picha na Wizara ya Mambo ya Ndani ya Nchi


Waziri wa Mambo ya Ndani ya Nchi, Mhandisi Hamad Masauni akizungumza wakati wa Ufunguzi wa Kikao cha Baraza Kuu la Wafanyakazi wa wizara hiyo kilichofanyika Makao Makuu ya Jeshi la Magereza,Msalato jijini Dodoma.Picha na Wizara ya Mambo ya Ndani ya Nchi



Naibu Waziri wa Mambo ya Ndani ya Nchi,Daniel Sillo akizungumza wakati wa Ufunguzi wa Kikao cha Baraza Kuu la Wafanyakazi wa wizara hiyo kilichofanyika Makao Makuu ya Jeshi la Magereza,Msalato jijini Dodoma.Picha na Wizara ya Mambo ya Ndani ya Nchi


Katibu Mkuu wa Wizara ya Mambo ya Ndani ya Nchi,Ally Senga Gugu akizungumza wakati wa Ufunguzi wa Kikao cha Baraza Kuu la Wafanyakazi wa wizara hiyo kilichofanyika Makao Makuu ya Jeshi la Magereza,Msalato jijini Dodoma.Picha na Wizara ya Mambo ya Ndani ya Nchi

Naibu Katibu Mkuu wa Wizara ya Mambo ya Ndani ya Nchi,Dkt.Maduhu Kazi akizungumza wakati wa Ufunguzi wa Kikao cha Baraza Kuu la Wafanyakazi wa wizara hiyo kilichofanyika Makao Makuu ya Jeshi la Magereza,Msalato jijini Dodoma.Picha na Wizara ya Mambo ya Ndani ya Nchi
Read more »

at Wednesday, May 01, 2024 0
WATUMISHI wa Taasisi ya Utafiti wa Wanyamapori Tanzania (TAWIRI)leo Mei Mosi 2024 wameungana na Wafanyakazi Duniani kote kuadhimisha Siku yao adhimu ambapo kitaifa maadhimisho yanaendelea katika uwanja wa Sheikh Amri Abeid jijinu Arusha na Mgeni Rasmi wa Sherehe hizo ni Makamu wa Rais wa Jamhuri ya Muungano wa Tanzania, Mhe. Dkt. Philip Isdor Mpango


TAWIRI tunajivuni mchango mkubwa wa watumishi katika kusimamia, kuratibu na kufanya tafiti za wanyamapori nchini kwa ustawi wa uhifadhi na kukuza utalii nchini.

Aidha, Kauli mbiu ya siku hii ya Wafanyakazi Duniani kwa mwaka huu ni *"Nyongeza ya Mishahara ni Msingi wa Mafao Bora na kinga Dhidi ya Hali Ngumu ya Maisha"*






Read more »

at Wednesday, May 01, 2024 0

Na Pamela Mollel Arusha

Waziri Mkuu, Mhe. Kassim Majaliwa amepongeza juhudi kubwa iliyofanywa na Mkuu wa Mkoa wa Arusha Mh.Paul Makonda katika maandalizi ya siku ya wafanyakazi Dunia (MEI MOSI)zinazofanyika Kitaifa katika uwanja wa Sheikh Amri Abeid Mkoa Arusha

Ameyasema hayo leo katika maandimisho ya Siku ya Wafanyakazi Duniani Mei Mosi ambapo amesifu kazi kubwa iliyofanywa na Makonda kuhamasisha makundi mbalimbali kuhudhuria maadhimidho hayo

“Nimeshiriki Maadhimisho mengi sanaa ila Arusha imetia fora kubwa maadhimisho haya nimpongeze sana Mh Makonda lakini pia na wananchi wa Arusha kwa kujitokeza kwa wingi”alisema Majaliwa

Kwa upande wake mkuu wa mkoa wa Arusha Poul Makonda amesema Mkoa huo ni shwari na tulivu hivyo wageni mbalimbali wanakaribishwa kufika katika jiji hilo

Pia ameomba miundombinu ya barabara katika jiji hilo kukarabatiwa ili kuharakisha shughuli za wananchi kusonga mbele kwa kuwa hali ya barabara za Arusha haziridhishi kabisa.





Read more »

at Wednesday, May 01, 2024 0
Na. Damian Kunambi, Njombe.

Serikali Imeoa fedha kiasi cha Sh. Mil. 800 kwaajili ya ujenzi wa soko la samaki katika kata ya Manda Wilayani Ludewa mkoani Njombe litakalo wezesha wavuvi wa ziwa Nyasa na wafanyabiashara wanaouza samaki kufabya biashara pasipo wasiwasi wa kuharibikiwa.

Akizungumza katia mkutano wa utambulishwaji wa mradi Mtaalamu kutoka Idara ya Miundombinu Michael Mbyalo amesema ujenzi wa soko hilo tayari mchakato wake umekwisha anza ambapo kuanzia sasa Mkandarasi ataleta vifaa na ndani ya wiki mbili zijazo ujenzi utaanza na unatarajiwa kukamilika Desemba 14 mwaka huu.

"Kwa utaratibu wa miradi leo tumekuja kumuonyesha Mkandarasi eneo analotakiwa kulijenga halafua kutokana na mkataba wetu atatakiwa kujiandaa kwa muda wa wiki mbili kwa kuleta vifaa mbalimbali ikiwemo kuzungushia wigo eneo la mradi kisha May 14 atatakiwa kuanza rasmi ujenzi". Amesema Mbyalo.

Naye Mkandarasi wa mradi huo kutoka katika kampuni ya Hyundavis Co.LTD amewataka wakazi wa maeneo hayo kujitokeza kupata ajira mbalimbali katika ujenzi huo kwani mradi huo utawapa kipaumbele zaidi wananchi wanaozunguka mradi badala ya wanaotoka nje ya mradi huo huku katibu wa Mbunge Alphonce Mwapinga akiwataka wananchi kuulinda mradi na kutofanya uharibufu ikiwemo kuiba vifaa.

Aidha kwa upande wake Mkurugenzi wa halmashauri ya wilaya hiyo Sunday Deogratius amesema soko hilo limekuja katika muda muafaka kwani kwa sasa wanatarajia kuanza kutoa mikopo kwa vikundi mbalimbali ili viweze kuweka vizimba na kufanya ufugaji wa samaki katika vizimba hivyo.

"Tayari tulishafanya majatibio ya ufugaji wa vizimba na ukawa na matokeo mazuri hivyo kwa sasa tunaka wavuvi wetu wajikite katika ufugaji wa vizimba ili watakapokosa samaki katika uvuvi wa kawaida soko lisikaukiwe na samaki kwakuwa watavuliwa katika vizimba", Amesema Deogratius.

Sanjari na hilo amempongeza Rais Dkt. Samia Suluhu Hassan pamoja na Mbunge wa jimbo la Ludewa kwa ushirikiano wao na kufanikisha kupatikana fedha hizo zitakazoenda kufanya mapinduzi ya kiuchumi wilayani humo.

Josaya Luoga ni Katibu siasa na Uenezi mkoa wa Njombe amemtaka Mkandarasi huyo kuhakikisha kuwa mradi huo unajengwa kwa viwango vinavyo hitajika na umalizike kwa wakati huku Mwenyekiti wa Chama Cha Mapinduzi Wilayani humo Stanley Kolimba akisema chama hicho ndicho chama chenye kujali wananchi wake.

Nao baadhi ya wavuvi na wafanyabiashara hao wa samaki wamepongeza hatua hiyo iliyo fikiwa na wamekuwa wakilisubiri kwa muda mrefu kwani samaki wamekuwa wakioza Kutokana na kutowauza kwa wakati na wakati mwingine hulazimika kuuza kwa bei ya chini ilimradi waishe kwa haraka.

Kukamilika kwa mradi huo utaenda kutatua changamoto za wavuvi na wafanyabiashara wa kata 8 zilizopitiwa na ziwa hilo wilayani humo sambamba na wilaya za jirani kitu ambacho kitaongeza ukuaji wa uchumi wa kata, Wilaya Mkoa na nchi kwa ujumla.





Read more »

at Wednesday, May 01, 2024 0
Kila ifikapo Aprili 28 ya kila mwaka, dunia huadhimisha siku ya Kimataifa ya Afya na Usalama Mahali pa Kazi kwa lengo la kuhamasisha afya na usalama wa wafanyakazi katika maeneo tofauti duniani.

Siku hii ni muhimu si tu kwa taasisi mbalimbali za umma na binafsi kwasababu sheria za ajira huwabana kuhakikisha wazingatia taratibu na kanuni zilizowekwa bali pia kwa wafanyakazi ambao kwa asilimia kubwa hutumia muda mwingi mahali pa kazi.

Uwepo wa maadhimisho maalum ya siku hii ni muhimu kwasababu kila mwaka umekuwa ukiwakumbusha na kuwahamasisha waajiri kuboresha mazingira yao ya kazi ili kuleta ufanisi zaidi na kulinda afya na usalama wa wafanyakazi wao.

Suala la afya na usalama mahali pa kazi hutofautiana kutoka sekta moja kwenda nyingine kutokana na aina ya shughuli wanayoifanya. Lakini hii sio sababu ya kwamba taasisi moja kuzingatia zaidi kanuni na taratibu zilizowekwa kuliko nyingine, zote zinapaswa kutimiza vigezo kwa mujibu wa sheria zilizowekwa.

Maadhimisho ya mwaka 2024 yanaongozwa na kauli mbiu inayosema ‘Kuangazia Athari za Mabadiliko ya Tabianchi kwa Usalama na Afya Kazini’. Kwa mujibu wa Shirika Kazi Duniani (ILO) kauli hii mbiu imetokana na ukweli kwamba mabadiliko ya tabianchi duniani yamekuwa yakiathiri wafanyakazi kupitia hatari zinazozidi kuongezeka kama vile joto kali, mionzi, matukio yanayosababishwa na mabadiliko ya hali ya hewa, uchafuzi wa hali ya hewa, magonjwa yanayosababishwa na mionzi nakadhalika.

Kwa Puma Energy, dira yetu ya Afya, Usalama, Usalama, na Mazingira (HSSE) ni "Kuwezesha na kuendeleza wafanyakazi wetu kuwa mstari wa mbele katika masuala ya Afya, Usalama, Ulinzi, na Mazingira ili Kuziwezesha Jamii Zetu." Hii inamaanisha kwamba tunaendelea kujitolea kila wakati kuendeleza wafanyakazi wanaohusishwa, wanaowezeshwa, na wanaoshirikishwa kuweka kipaumbele kuhusu afya na usalama wao, pamoja na wa wengine.

 Kila mtu ana haki ya kuwa salama kazini na kurudi nyumbani kwa familia na marafiki akiwa na afya njema kama walivyoanza siku. Tunatambua kwamba kujizatiti kwetu kwa usalama sio tu kuwalinda wafanyakazi wetu bali pia kunachangia mazingira yetu. Kwa kukuza mazoea ya ufanyaji kazi salama, tunapunguza hatari ya matukio na kutengeneza mahali pa kazi thabiti na stahimilivu zaidi.

Akizungumzia kuhusiana na umuhimu wa maadhimisho ya siku hii, Meneja wa Masuala ya Afya, Usalama, Ulinzi, na Mazingira (HSSE) wa Puma Energy Tanzania, Bw. Ambokege Minga ameelezea kuwa wamewekeza nguvu kubwa sio tu katika kuhakikisha kuwa kampuni inazingatia kanuni na taratibu zilizowekwa kwa mujibu wa sheria bali pia hutoa elimu ya kina kwa wafanyakazi na washirika wote katika uendeshaji wa shughuli zake nchini.

“Kampuni inaongozwa kwa mujibu wa amali ambazo zinawataka wafanyakazi na washirika wote kuzifuata katika uendeshaji wa shughuli zetu za kila siku. Tunajivuna kuwekeza nguvu kubwa katika kutoa elimu na kuwahamasisha wafanyakazi kuzingatia masuala ya afya na usalama mahali pa kazi na kuwa mabalozi kwa wenzao nchini kote. Tumewapatia nguvu ya kusimamia na kutoa taarifa muda na mahali popote ambapo wataona kanuni za afya na usalama zitakapokiukwa,” aliongezea Bw. Minga.

Bw. Minga aliendelea kuwa uzingatiaji wa afya na usalama hauishii kwa wafanyakazi pekee bali pia hata kwa wakandarasi wanaofanya nao kazi pamoja na wageni wanaowatembelea. Lengo ni kuhakikisha hakuna mtu yoyote anayeumia au kupata madhara pindi anapofanya nao kazi au awapo maeneo yao ya kazi.

Puma imeongezea kuwa inatoa vifaa vya kuwakinga wafanyakazi wake na hatari ambazo zinaweza kujitokeza wakiwa mahali pa kazi kama vile vikingamwili. Pia, inawahamisha kutoa taarifa pindi wanapoona sheria zinakiukwa. 

Kwa mfano, wakaona mkandarasi anafanya kazi akiwa amevalia vikingamwili lakini wafanyakazi wake hawana. Hii inaenda sambamba na kuwatia moyo kutoa taarifa kwa matukio ambayo si salama katika utendaji wa kazi. Matukio haya hutoa mafunzo na elimu kwa wafanyakazi wote ili kudhibiti kutojirudia.

“Tunajivunia kuwa mpaka sasa tumefanikiwa kwa kiasi kikubwa kufikia malengo makubwa ya masuala ya afya na usalama kwasababu hatujapa kesi za ajali au vifo mahali pa kazi kuanzia mwaka kuanza mpaka sasa hivi. Tunafanya jitihada kubwa katika kutoa elimu, kuwalinda na kuwahamasisha wafanyakazi wetu wote katika shughuli zetu za upokeaji, utunzaji, na usafirishaji wa mafuta kwa maendeleo ya wananchi na taifa zima kwa ujumla,” aliongezea Bw. Minga.

Kwa upande wake Mtaalamu wa Udhibiti wa Mazingira ya Usalama wa Afya na Ubora wa Puma Energy Tanzania, Bi. Rehema Madoffe amemalizia kwa kusema kuwa, “tunahakikisha wafanyakazi wote wanakuwa na bima za afya bora ambazo huwalinda pindi wanapokumbwa na changamoto za kiafya. Pia, mahali pa kazi kuna miundombinu imejengwa kwa uthabiti na ubora ili kukabiliana na changamoto mbalimbali kama vile majanga ya moto. 

Kwa kuongezea, wafanyakazi hupatiwa mafunzo kukabiliana na majanga ya moto ambapo kila mwezi kwa baadhi ya maeneo yetu ya kazi huwa tunafanya mafunzo ili kujiandaa pindi tunapokumbwa na majanga ya aina yoyote.”


Read more »
Older Posts
Subscribe to: Posts (Atom)


Top News