wachawi 10 wajitokeza 'kuiroga' brazil watapocheza na taifa stars

Mfadhili mkuu wa zamani wa Simba Azim Dewji (kulia) akiwa na Naibu Waziri wa Nishati na Madini Mh. Adam Malima (kati) na Mbunge wa Sumve Mh. Richard Ndassa siku neshno jipya lilipofunguliwa rasmi.

Wachawi 10 wamejitokeza kutengeneza ndumba zitazoiwezesha Taifa Stars kushinda mechi yao na Brazil siku ya Jumatatu katika nesho jipya jijini Dar, mfadhili mkuu wa zamani wa Simba Azim Dewji amesema leo.

Azim kaiambia Globu ya Jamii mchana huu kwamba baada ya kutangaza juzi kwamba atatoa shilingi milioni 10 kwa kila mchawi atayewezesha Taifa Stars ishinde, amepigiwa simu toka kwa watu 10 ambao wamedai wao ni wachawi mahiri na wako tayari kuifanya kazi hiyo.

"Wote walionipigia simu kuwa wako tayari kufanya kazi hiyo nimewaomba wafike ofisi za TFF kesho saa tano asubuhi kuandikishiana mikataba na makubaliano mengine.

"Wamekubali wote nami najiandaa kuwazawadia milioni 10 kila mmoja wao endapo tutawafunga Brazil. Lakini tukifungwa mkataba utakuwa kwamba wote watapigwa picha na sura zao kuoneshwa kwenye vyombo vya habari kuwa ni matapeli..." amesema Azim.

Amesema wazo la kutoa zawadi hiyo limemjia kwa kutaka kudhihirisha kwamba soka si uchawi bali ni mazoezi na mipangilio ya maendeleo ya muda mrefu, hivyo endapo kama Taifa Stars itashinda itajionesha dhahiri kwamba ndumba nangai ipo na inaweza kufanya kazi.

"Mimi siamini uchawi iwe katika soka ama katika maisha ya kawaida yoyote yale. Lakini kuna baadhi yetu tunaamnini sana uchawi, hivyo testi itakuwa hii mechi yetu na Brazil. Tukishinda tutaanza kuamini ndumba na nitawazawadia hao wachawi wataojitokeza.

"Dunia nzima inatambua kwamba Brazil ni timu bora. Ingawa Taifa Stars nayo sio timu ya kubeza lakini kuwafunga mabingwa hao wa mara tano itakuwa si rahisi sana. Hivyo nimeona nitoe changamoto hii ili kudhihirisha kwamba soka sio lelemama linahitaji maandalizi", kasema Azim.

Taifa Stars hivi sasa wanaelekea nchini Rwanda ambako Jumapili watakipiga na timu ya Taifa ya nchi hiyo katika kuwania nafasi ya kucheza kombe la Mataifa ya Afrika kwa wachezaji wa nyumbani. Katika gemu lao la kwanza hapa Dar walitoka sare ya 1-1 hivyo inabidi Jumapili washinde.

Taifa Stars watarejea nyumbani Jumatatu alfajiri kwa ndege maalumu ambapo jioni yake watakumbana na Brazil katika mchezo unaotajwa kuwa wa karne.