SCANIA BUS EXPO YAKUTANISHA WADAU WA USAFIRISHAJI

Kampuni ya Scania Tanzania, imefanya maonyesho ya miundo tofauti ya mabasi yake yanayoundwa na makampuni mbalimbali ya kuunda mabasi nchini na nchi jirani. Maonyesho hayo yaliyofahamika kama “SCANIA BUS EXPO 2014” yalikutanisha wadau mbalimbali wa sekta ya usafirishaji hasa usafirishaji wa abiria.

Akizungumza na waandishi wa habari katika maonyesho hayo,  Meneja usafirishaji wa kampuni ya Scania, Godwin Rwegasira, alisema “Scania tumejikita thabiti kabisa katika sekta ya usafirishaji, tunatengeneza malori yaliyo bora yanayotumia mafuta kidogo na tunazingatia usalama wa watumiaji wote wa Barabara.

Mkurugenzi Mkuu wa Kampuni ya Scania nchini, Anders Friberg akizungumza na waandishi wa habari pamoja na wageni waalikwa wakati wa uzinduzi wa toleo jipya la mabasi ya Scania aina ya Viagio 1050 uliofanyika makao makuu ya Kampuni hiyo jijini Dar es Salaam.

Kwa sasa tunapoelekea kumaliza mwaka 2015 tumeonelea ni vizuri kuandaa shughuli hii ili wanunuzi wa mabasi ya Scania wapate kukutana na waundaji wa mabodi yake uso kwa uso na kuzungumza. Pamoja na kutengeneza fursa za kibiashara, lengo hasa ni kuwapa nafasi wanunuzi wa mabasi kuona na kuchagua kazi mbalimbali za waundaji wa mabodi. Tunaomba mtumie nafasi hii kwa lengo la kuboresha sekta hii ya usafirishaji wa abiria”.

Maonyesho haya yalishuhudia waundaji mbalimbali wa mabasi kutoka ndani na nje. Miongoni mwa waliong’ara kwa kuonyesha mabasi mazuri ni pamoja na Master Fabricators na Chonda Fabricators makampuni ya kuunda mabodi kutoka Kenya. Kutoka Tanzania kampuni iliyopata fursa kuonyesha mabasi yake ni Quality Engineering ya jijini Dar.

Wakikata utepe kuashiria uzinduzi huo.

Mr. Jazimeni Koba, Meneja Mauzo wa Quality Motors Limited wanaomiliki kitengo hicho cha kutengeneza mabodi alisema, “maonyesho haya yanatusaidia sana kwani watanzania wengi walidhani mabodi ya mabasi hutengenezwa nje ya nchi tu, Karakana yetu ni ya kisasa kabisa na tunatengeneza muundo wowote wa bodi kadiri mteja anavyohitaji, tunasifika kwa kutengeneza mabasi imara yanayosafiri katika mikoa mbalimbali nchini na hata nchi za jirani kama Zambia, Malawi, Burundi nk”

Maonyesho haya yalihusisha taasisi za fedha zinazotoa mikopo kwa wanunuzi wa mabasi, kampuni ya Scania Finance na benki ya Stanbic walipata fursa ya kuhudumia wateja mbalimbali waliokuwa na kiu ya kujua huduma za fedha zinazotolewa kwa wanunuzi walio na uhitaji.

Wananchi mbalimbali wakitoa maoni yao waliomba Scania Tanzania wafanye maonyesho haya mara kwa mara ili kupanua wigo wa mawasiliano baina ya wadau mbalimbali wa sekta hii, na pia kuongeza changamoto baina ya makampuni haya ya kutengeneza mabodi ili mwisho wa siku wasafiri waweze kupata huduma yenye ubora wa juu unaostahili.