jengo jipya la ubalozi wetu washington DC

Jumatatu wiki hii JK alifungua jengo jipya la Ubalozi wa Tanzania mjini Washington DC lililonunuliwa kwa dola milioni 10.415, sawa na shilingi bilioni 13.5.
Akihutubia wakati wa sherehe za ufunguzi, Rais Kikwete alisema jengo hilo mbali ya matumizi ya ofisi, lakini pia ni ishara ya kisiasa na kidiplomasia kuonesha kuwa uhusiano wa Tanzania na Marekani unakua vizuri.

Akizungumza wakati wa kumkaribisha Rais Kikwete, Waziri wa Mambo ya Nje na Ushirikiano wa Kimataifa, Bernard Member, alisema jengo hili ndilo kubwa kuliko majengo yote ya balozi za Tanzania duniani.

Kwa mujibu wa Balozi wa Tanzania nchini Marekani, Balozi Ombeni Sefue, jengo hilo la ghorofa sita lina eneo la futi za mraba 26,240 na litagharimu dola 367,593.54 (shilingi milioni 477) kulitunza kwa mwaka.

Kutokana na kuwepo katika eneo zuri katikati ya Jiji la Washington, serikali imeuagiza ubalozi kupangisha ghorofa tatu ili mbali ya kipato kwa serikali, upangiashaji huo usaidie kulitunza jengo hilo kwa gharama.

Awali mtathimini anayetambuliwa kisheria, Riley & Associates LLC, alikadiria jengo hilo kuwa na thamani ya dola milioni 11,200,000, wakati Jiji la Washington lilitoa thamani ya dola milioni 11,456,200 kwa ajili ya makadirio ya kodi kwa mwaka 2009.

“Tumefanikiwa kulipata jengo hili kwa bei rahisi zaidi kuliko thamani yake, hivyo tumeokoa dola 1,585,000,” alisema Balozi Sefue na kuongeza: “Tulifuata taratibu zote ambapo wizara na ofisi zote husika za Tanzania na Marekani zilihusishwa katika manunuzi.”

Kwa wastani jengo hilo limenunuliwa kwa dola 397 kwa futi moja ya mraba kulinganisha na bei ya majengo mengine katikati ya Jiji la Washington ambayo hugharimu kati ya dola 400 na 900.

Ndani ya jengo hilo lililo kwenye Mtaa wa 22 mkabala na hoteli ya Marriot, kuna picha ya Rais Kikwete na Rais George wa Marekani wakiwa Ikulu Dar es Salaam; picha ya Rais Kikwete na Rais Barack Obama wakiwa Ikulu ya Marekani, Washington DC; picha ya Rais Julius Nyerere wa Tanzania enzi hizo, akiwa na Rais wa Marekani enzi hizo, Jimmy Carter kwenye Ikulu ya Washington DC.

Pia kuna picha rasmi mbili za sura za viongozi, Rais Kikwete na Baba wa Taifa, Mwalimu Nyerere pamoja na picha zingine za mapambo ya fahari ya Tanzania.