TATIZO KATIKA MFUMO WA USAJILI KUWA HISTORIA

Afisa Mtendaji Mkuu wa Wakala ya Usajili wa Biashara na Leseni (BRELA), Bw. Godfrey Nyaisa amesema kwamba matatizo yote katika Mfumo wa usajili kwa njia ya mtandao (ORS) sasa kuwa historia.

Hayo ameyabainisha wakati akijibu hoja za wafanyabiashara wa Mkoa wa Simiyu siku ya jana tarehe 25 Februari, 2020 katika kikao cha mashauriano kati ya serikali na Wafanyabiashara.

Akizungumza katika kikao hicho Bw. Nyaisa amebainisha kwamba, BRELA imechukua hatua za makusudi katika kutatua changamoto katika mfumo wa usajili na punde itabaki kuwa historia.

“Katika kutatua changamoto katika mfumo marekebisho makubwa ya kimfumo yanafanyika na mpaka hivi sasa mfumo unafanya kazi katika hali ya kawaida, pia jitihada zaidi zinaendelea kufanyika ili kuhakikisha kwamba kwa wakati wote wadau wetu wanapata huduma” alibainisha Bw. Nyaisa.

Katika hatua nyingine Bw. Nyaisa ametoa habari njema kwa wadau wa BRELA juu ya Ujio wa kituo cha miito (Call center).

Ambapo ameeleza kwamba kituo hiki kitakua ni msaada mkubwa kwa wadau wote waliombali pale wanapopiga simu waweze kupata msaada wa haraka.

Kwa kutumia mfumo huu, pale wadau wanapopiga simu kwa ajili ya msaada simu hiyo inaenda katika namba iliyo huru kwa wakati huo.

Mkutano huo umefanyika chini ya Waziri wa nchi Ofisi ya Waziri Mkuu – Uwekezaji Mhe. Angellah Kairuki akiambatana na Manaibu Waziri saba kutoka Wizara za Ujenzi, Mawasiliano na Uchukuzi, Fedha na Mipango, Mambo ya Ndani ya Nchi, Madini, Maliasili na Utalii, Mazingira pamoja na Viwanda na Biashara.