RC TABORA AAGIZA UFUNGAJI WA MFUMO WA KUKUSANYA MAPATO KATIKA MAENEO YA UTOAJI HUDUMA ZA AFYA

NA TIGANYA VINCENT

MKUU wa Mkoa wa Tabora Aggrey Mwanri ameuagiza uongozi wa Halmashauri ya Manispaa ya Tabora kuhakikisha wanafunga Mfumo wa ukusanyaji wa mapato kwa katika maeneo yote yanayosuka na utoaji wa huduma za afya ili kuongeza kiwango cha ukusanyaji mapato.

Ukusanyaji wa mapato kwa njia za stakabadhi zilizo katika vitabu zimesababisha baadhi ya mapato kupotea na mengine kuishia mifukoni mwa watumishi wasio waaminifu.

Mwanri ametoa kauli hiyo jan20a wakati wa ukaguzi wa utekelezaji wa shughuli za Malipo kwa Ufanisi (RBF) kwenye Vituo na Zahanati mbali katika Manispaa hiyo.

Alimwagiza Mkurugenzi Mtendaji wa Manispaa ya Tabora kuhakikisha Vituo vyote na Zahanati zote zinafungwa mfumo wa Serikali wa ukusanyaji wa mapato katika Hospitali mapema iwezekavyo.

Naye Katibu Tawala Mkoa wa Tabora Msalika Makungu alisema kitendo cha Vituo na Zahanati kuendelea kukusanya mapato kwa mfumo wa zamani ni kinyume na agizo la Serikali lililotolewa mwaka 2016.

Alisema tangu mwaka huo hadi 2020 bado kuna Zahanati na Vituo vya Afya vinaendelea kukusanya fedha kwa kutumia stakabadhi za zamani jambo ambalo wakati mwingine linasababisha kuzalishwa kwa Hoja za Kiukaguzi.

Makungu alisema sehemu zilizofunga mfumo wa ukusanyaji wa mapato kwa Mtandao umesaidia kuongeza mapato mara mbili akitoa mfano wa Hospitali ya Rufaa ya Kitete ambapo makusanyo yameongezeka kutoka milioni 30 kwa mwezi hadi kufika 60.

Alisisitiza ni lazima Zahanati, Vituo vya Afya na Hospitali zote zifunge mfumo wa ukusanyaji wa mapato ili ziwe kupata fedha ambazo zitawawezesha kujitegemea ifikapo 2025.

Mkuu wa Mkoa wa Tabora Aggrey Mwanri akizungumza jana na wagonjwa katika Zahanati ya Ng’ambo wilayani Tabora wakati wa ziara ya ukaguzi wa utekelezaji wa shughuli za Malipo kwa Ufanisi (RBF) kwenye Vituo na Zahanati mbali katika Wilayani humo.