DIWANI KATA YA MZIMUNI AIPONGEZA SERIKALI KWA KUTEKELEZA MIPANGO YA MAENDELEO

Na Mwandishi Wetu

DIWANI wa Kata ya Mzimuni wilayani Kinondoni jijini Dar es Salaam, Manfred Lyoto ameipongeza Serikali inayoongozwa na Rais Dk.Samia Suluhu Hassan kwa kuonesha nia kubwa ya kufikia malengo ya maendeleo kwa ajili ya Watanzania.

Pongezi hizo zimetolewa na Lyoto wakati akizungumza na waandishi wa habari ambapo ametumia nafasi hiyo kumpongeza Mwenyekiti wa Chama cha Mapinduzi na Rais wa Jamhuri ya Muungano wa Tanzania Dkt. Samia Suluhu Hassan kwa uchapakazi wake .

“Dk. Samia Suluhu Hassan amekuwa akiwataka viongozi kuhakikisha wanaweka mazingira mazuri kwa wawekezaji wa ndani na nje ya nchi ili kustawisha uchumi wa nchi na kuacha urasimu na unyanyasaji dhidi ya kundi hilo muhimu kwa ustawi wa uchumi wa nchi,”amesema Lyoto.

Lyoto ambaye amekuwa akitekeleza kwa vitendo Ilani ya CCM, hivi karibuni amewahi pia kupongezwa na kamati tendaji ya CCM kata ya Mzimuni kwa kujitolea kuwalipa posho watumishi wa afya wanaojitolea katika Zahanati ya Mzimuni.

Diwani huyo amesema Dkt. Samia Suluhu Hassan amechochea maendeleo mengi katika kukuza uchumi na kusema kuwa hali ya kiuchumi kwa sasa , kutokana na wawekezaji wengi ambao awali waliamua kuhamisha biashara zao katika mataifa mengine kwa sasa wanaonekana kurudi nchini kwa kasi na hivyo nchi kunufaika kiuchumi.

Diwani Kata ya Mzimuni wilayani Kinondoni, Dar es salaam Manfred Lyoto akifafanua jambo